რუსეთის ფედერაციის საგარეო საქმეთა სამინისტრო ევროკავშირის მიერ დაწესებულ სანქციებს გამოეხმაურა. ოფიციალურ განცხადებაში ნათქვამია, რომ დამატებითი სანქციების დაწესებაზე პასუხისმგებლობა ბრიუსელს ეკისრება, აღნიშნული გადაწყვეტილებით კი ტერორისტული დაჯგუფებები ისარგებლებენ.
“სანქციების დამატებითი სია პირდაპირ ადასტურებს, რომ ევროკავშირის ქვეყნებმა კურსი რუსეთთან საერთაშორისო და რეგიონალური უსაფრთხოების, ასევე მასობრივი განადგურების იარაღის, ტერორიზმის, ორგანიზებული დანაშაულის და უსაფრთხოების ახალი გამოწვევების წინააღმდეგ ბრძოლის საკითხებში თანამშრომლობასთან დაკავშირებით შეცვალეს. დარწმუნებული ვართ, ამ გადაწყვეტილებას დიდი სიხარულით შეეგებებიან საერთაშორისო ტერორისტული ჯგუფები. ამ ნაბიჯზე პასუხისმგებლობა ბრიუსელს ეკისრება. ეს საერთაშორისო ასპარეზზე მდგომარეობის გაუარესების ფონზე ხდება.“- ნათქვამია განცხადებაში.
შეგახსნებთ, რომ ევროკავშირმა რუსეთის ფედერაციის მაღალჩინოსნების წინააღმდეგ პერსონალური სანქციები დააწესა.
