პარლამენტის ვიცე-სპიკერი მანანა კობახიძე „ნაციონალური მოძრაობის“ მიერ პლენარული სხდომის დატოვებას გამოეხმაურა და განაცხადა, რომ „ეს მათი სტილია“.
"კარგია, რომ უმცირესობამ დარბაზი დატოვა, უფრო თავისუფალი სუნთქვის საშუალებაა. ესაა მათი ზრდილობა. ბატონმა ბაქრაძემ თავისივე თანაგუნდელებს არ მოუსმინა, ბოლოს შემოვიდა და ისაუბრა ისე, თითქოს ბრიტანეთის ლეიბორისტული თუ კონსერვატიული პარტიის ლიდერი იყოს, შემდეგ მოუხმო მთელს გუნდს და წავიდა. ეს არის მათი სტილი", - განაცხადა კობახიძემ.
მისივე თქმით, ხელისუფლებამ „ნაციონალური მოძრაობის“ ყველა ბრალდებას პასუხი უნდა გასცეს.
"ვთვლი, რომ ამ ადამიანებს ნამდვილად საკადრისი პასუხი უნდა გავცეთ ყველა იმ ბრალდებასა და დემაგოგიაზე, რასაც ვისმენთ. დიახ, საზოგადოება ითხოვს, რომ ჩვენ მათ პასუხი გავცეთ, ესაა საზოგადოების დაკვეთა", - განაცხადა კობახიძემ.
