პარლამენტის თავმჯდომარემ, დავით უსუფაშვილმა, პლენარულ სხდომაზე გამოსვლისას განაცხადა, რომ ქვეყნისთვის მთავრობის დამტკიცება და ახალი მინისტრთა კაბინეტისთვის ნდობის გამოცხადება მნიშვნელოვანი მოვლენაა.
"არ ვიცი საზეიმოა თუ მნიშვნელოვანი დღე, მაგრამ ერთი რამ ვიცი, რომ ქვეყნის ცხოვრებაში მთავრობის დამტკიცება, იმ ხალხისთვის ნდობის გამოცხადება, რომელმაც ჩვენი ქვეყნის მართვა უნდა გააგრძელოს, მნიშვნელოვანი დღეა. ასეთ დღეს ემოციები სჭარბობს ", - განაცხადა უსუფაშვილმა.
პარლამენტის თავმჯდომარემ დეპუტატებს ის დოკუმენტებიც წარუდგინა, რომელთა მიხედვითაც ხელისუფლებამ ქვეყანა უნდა მართოს.
„მინდა, ცოტა სხვა თემაზე ვისაუბრო. თან წამოვიღე სამი დოკუმენტი, კონსტიტუცია, მთავრობის პროგრამა - "ძლიერი, დემოკრატიული ერთიანი საქართველოსთვის" და ასოცირების ხელშეკრულება, რომელიც დღეს მნიშვნელოვანია. მნიშვნელოვანია, რომ შევჯერდეთ ამ სამი ძირითადი დოკუმენტის გეგმის საფუძველზე როგორ გააგრძელოს "ქართულმა ოცნებამ" ქვეყნის მართვა. დაახლოებით ორ წელიწადში ისევ დავდგებით ამომრჩევლის წინაშე, როგორ ვუპატაკოთ ქართველ ხალხს, რომ ჩვენ წინ წავიყვანეთ ქვეყანა და შევასრულეთ, რაც ამ დოკუმენტებში წერია. ეს არის მნიშვენლოვანი და ეს არის ძირითადი", - განაცხადა უსუფაშვილმა.
