სამშენებლო და სარემონტო მასალების კომპანია „გორგიამ“, რომლის დამფუძნებელიც გია გორგოშაძე გახლავთ და რომლის სახელის ირგვლივ ატეხილ სკანდალზე ჩვენ უკვე ვწერდით, ამიერკავკასიაში ყველაზე დიდი ჰიპერმარკეტი გახსნა. „გორგიას“ მენეჯმენტთან ერთად, ჰიპერმარკეტი თბილისის არჩეულმა მერმა,  დავით ნარმანიამ და ეკონომიკის მინისტრის მოადგილემ - მიხეილ  ჯანელიძემ გახსნეს.

აღნიშნულ ინფორმაციაში, უჩვეულო, თითქოს არაფერია, რომ არა ერთი საინტერესო  ფაქტი.  იგივე კომპანია, 2011 წლის მაისში, დედაქალაქის ყოფილმა მერმა, გიგი  უგულავამაც  გახსნა.

საინტერესოა, იცოდნენ თუ არა ამ ფაქტის თაობაზე ნარმანიას იმ გარემოცვაში, რომელმაც  მას აღნიშნული ღონისძიება დაუგეგმა, თუმცა, ცალსახაა, რომ ეს ფაქტი იმაზე ბევრად უარესია, ვიდრე  სააკაშვილის მიერ,  2-ჯერ, ან მეტჯერ, ივანიშვილის ფინანსებით აგებული ერთი და იგივე  საწარმოებისა და დაწესებულებების გახსნა.

ამასთანავე, „რეპორტიორისთვის“ ცნობილი გახდა, რომ „ბი ემ სი გორგიას“ გენერალური დირექტორი მიშა ავალიანი გახლავთ, რომელიც, არც მეტი, არც ნაკლები - დედაქალაქის ყოფილი მერის გიგი უგულავას მარჯვენა ხელი და თბილისის მერიის ზედამხედველობის სამსახურის ყოფილი ხელმძღვანელია. თუ გორგოშაძის ყოფილი მეუღლის ნინო დარსალიას  ნათქვამსაც გავიხსენებთ, - გორგოშაძეს ნაციონალებთან ფინანსური ვალდებულება აქვსო, -  გასაგებიც და ნათელიც გახდება უგულავას ჩინოვნიკის „გორგიაში“ გადირექტორების მიზეზები.

აღნიშნულ თემასთან დაკავშირებით "რეპორტიორში" გამოქვეყნებული სტატიის ბმულები:

  ნინო დარსალია: გია გორგოშაძე „ნაციონალებს“ ხშირად აძლევდა ხან ფულს, ხან პროდუქციას

ნინო დარსალია: „გორგიას“ 50 მილიონი ჩემია!