ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა ჟურნალისტებთან საუბარში განაცხადა, მთავრობა სამართლიანობის უზრუნველსაყოფად ყველაფერს აკეთებს. მინისტრი ამ კომენტარით ამერიკის შეერთებული შტატების სენატორების განცხადებას გამოეხმაურა, რომლებმაც მიხეილ სააკაშვილის პასუხისგებაში მიცემა უარყოფითად შეაფასეს.
"ამერიკელი სენატორების, მეგობრების, პარტნიორების რჩევებს ვითვალისწინებთ, შესაბამისად, საქართველოს მთავრობა ყველაფერს აკეთებს იმისათვის, რომ კანონის წინაშე ყველა თანასწორი იყოს და სამართლიანობა იყოს უზრუნველყოფილი", - განაცხადა პეტრიაშვილმა.
პეტრიაშვილის თქმით, ყოფილ მაღალჩინოსნებთან დაკავშირებულ საქმეებზე მიმდინარე გამოძიება დასავლელ პარტნიორებთან მომავალში პრობლემებს არ შექმნის.
