„რეპორტიორის" პრესკლუბში გამართულ ბრიფინგზე უფლებადამცველმა დიმიტრი ლორთქიფანიძემ გაერო-ს სამიტთან დაკავშირებით განვითარებულ მოვლენებზე ისაუბრა. მისი განცხადებით, მიმდინარე პროცესებმა სრულიად აბსურდული სახე მიიღო.
„ქვეყანაში მწიფდება სერიოზული პოლიტიკური კრიზისი. ქალბატონი თეა წულუკიანი აცხადებს, რომ პრეზიდენტი მარგველაშვილი არის მათი გუნდის წევრი და ამ დროს მათივე გუნდის წევრი ზაქარია ქუცნაშვილი კონსტიტუციით აღჭურვილი მიდის პრეზიდენტთან სასახლეში და უკითხავს მას სალექციო კურსს, რათა შეაგონოს მას, რომ პოლიტიკური და სამართლებრივი მიზანშეწონილობა არ ითვალისწინებს, მან მიიღოს, როგორც ქვეყნის კონსტიტუციის გარანტმა და ამავდროულად უმაღლესმა საგარეო წარმომადგენლობითი ფუნქციის მატარებელმა პირმა, საერთაშორისო ფორუმში მონაწილეობა. ეს ყოველგვარ გუნდურ წარმოდგენას ცდება.
იმის მაგივრად, რომ მძიმე სოციალური თუ ეკონომიკური პრობლემების მოგვარებით იყვნენ დაკავებული, გვესმის ყოველდღიური კინკლაობა, რამაც სრულიად აბსურდული სახე მიიღო. „იმერული ესკიზების" ეპიზოდი რომ გავიხსენოთ, იბადება კითხვა, რა სარგებლობა მოაქვს პრეზიდენტს?! აი, ამ დონემდე დაიყვანა „ქართული ოცნების" აღმასრულებელმა გუნდმა პრეზიდენტის ინსტიტუტის სტატუსი",- განაცხადა დიმიტრი ლორთქიფანიძემ.
