უნიკალური ოპერაცია თბილისის ზოოპარკში - სომხეთიდან ჩამოყვანილ სპილო „გრანდს“  მარცხენა ეშვი ამოუღეს, რომელიც წლების წინ დაუზიანდა.

ოპერაცია ექვს საათს გაგრძელდა.

ოპერაციას ლონდონიდან მოწვეული სტომატოლოგი პიტერ კერტესი ხელმძღვანელობდა.

ოპერაციას გართულებები მოყვა, სპილოს ნარკოზიდან გამოსვლა გაუჭირდა, რამაც მის სიცოცხლეს საფრთხე შეუქმნა. რამდენიმე საათიანი ძილის შემდეგ  „გრანდმა“ გაიღვიძა და საფრთხემაც ჩაიარა.

„გრანდის“ გაღვიძებას უამრავი ადამიანი ელოდებოდა. ზოოპარკის ადმინისტრაცია მადლობას უხდის საზოგადოებას გულშემატკივრობისთვის.

„ურთულესი, უმძიმესი დღის საოცარი დასასრული!!!

გრანდი ფაქტობრივად ხელმეორედ დაიბადა!!!

ძალიან, ძალიან, ძალიან დიდი მადლობა ყველას ასეთი საოცარი, არნახული გულშემატკივრობისთვის და სიყვარულისთვის!“ - წერენ თბილისის ზოოპარკის „facebook” ოფიციალურ გვერდზე.

“გრანდს” ოპერაცია ერთი წლის შემდეგაც ჩაუტარდება, ოღონდ მარჯვენა ეშვზე.

სპილო სომხეთიდან 2014 წლის ივლისში მდედრობითი სქესის სპილო "მალკასთან" შესაჯვარებლად ჩამოიყვანეს.

ზოოპარკის ადმინისტრაცია აცხადებს, რომ ეშვები "გრანდს" 6 წლის წინ მოტყდა, ჯერ კიდევ მაშინ, როცა ერევანში ცხოვრობდა. არსებობდა ინფექციის საფრთხე, ამიტომ აუცილებელი გახდა ქირურგიული ჩარევა.