ევროატლანტიკურ საკითხებში სახელმწიფო მინისტრის პირველ მოადგილეს დავით დონდუას მისი ყოფილი მძღოლი ზეწოლაში ადანაშაულებს. ბაქარ ჭეიშვილის განცხადებით, დონდუა ყავის აპარატების ბიზნესში მისი პარტნიორი იყო. მისივე თქმით, მინისტრის მოადგილე მას ემუქრებოდა და ყოფილ თანამშრომლებს მის წინააღმდეგ ჩვენების მიცემას აიძულებდა. ჭეიშვილის თქმით, მინისტრის მოადგილემ მის წინააღმდეგ სარჩელი უსამართლოდ შეიტანა.
სამინისტროს საპასუხო განცხადებაში კი წერია, რომ ჭეიშვილის მუშაობის პერიოდში სამსახურეობრივი მოვალეობის შესრულების შემდეგ მანქანიდან ძვირადღირებული ნაწილები დაიკარგა. საფუძვლიანი ეჭვის არსებობის გამო, ათი დღის წინ დავით დონდუამ პოლიციაში განცხადება შეიტანა.
„დავიწყე ლეგალური ბიზნესი, რის შედეგადაც სამსახურის პერიოდში მინისტრის მოადგილე თავისი სურვილით შემოვიდა წილში. სამსახურის დატოვებიდან ორ დღეში დამირეკა, მემუქრებოდა და ფულის ამოღების სურვილი ჰქონდა. თანხა არარეალურ დროში მოითხოვა. შესაბამისად, ვერ მოვახერხე ორი ათასი დოლარის გადახდა. მეშინია, რომ როგორც ჩემს თანამშრომლებზე ახდენდნენ ზეწოლას, იგივე ზეწოლა არ განხორციელდეს გამოძიებაზეც. არასამთავრობო ორგანიზაციას ამიტომ მივმართე",-აცხადებს მინისტრის ყოფილი მძღოლი.
