ცხინვალის დე-ფაქტო პარლამენტი საქართველოს პრემიერ-მინისტრ ირაკლი ღარიბაშვილის გაეროს 69-ე სესიაზე სიტყვით გამოსვლას ეხმაურება. როგორც განცხადებაშია ნათქვამი, სამხრეთ ოსეთს საქართველოს ტერიტორიულ მთლიანობასთან კავშირი არ აქვს.
"სამხრეთ ოსეთს არავითარი კავშირი საქართველოს ტერიტორიულ მთლიანობასთან არ გააჩნია. არ დავიწყებდი ჯანსაღი აზრის ძიებას საქართველოს პრემიერ-მინისტრის მიერ გაკეთებულ განცხადებაში, თუნდაც ეს გაეროს ტრიბუნიდან იყოს ნათქვამი. ჩვენ ასეთი განცხადებები ქართველი პოლიტიკოსებისგან არაერთხელ მოგვისმენია", - განაცხადა ე.წ. პარლამენტის საგარეო ურთიერთობათა კომიტეტის თავმჯდომარე იგორ კოჩიევმა. ინფორმაციას სააგენტო "რესი" ავრცელებს.
მისი თქმით, ე.წ. სამხრეთ ოსეთის სახელმწიფოებრიობა დაფუძნებულია ხალხის ნების გამოვლინებაზე, ხოლო რუსეთის პრეზიდენტის ბრძანებულებებმა სამხრეთ ოსეთისა და აფხაზეთის დამოუკიდებლობას საფუძველი გაუმყარა. კოჩიევმა განაცხადა, რომ რესპუბლიკის ხელმძღვანელობამ არაერთხელ გამოხატა შერიგების სურვილი თუ საქართველო აღიარებს ოსი ხალხის გენოციდს, შეიარაღებულ აგრესიასა და რესპუბლიკის დამოუკიდებლობას.
