ახალგაზრდა ქართველმა რეჟისორმა, 23 წლის ბესო თურაზაშვილმა აბუ-დაბიში ახალი ფილმი „გადაკარგულები" გადაიღო.
ფილმში მთავარ როლებს თინა დალაქიშვილი და პაატა ინაური ასრულებენ. გადაღებები ექვსი თვის მანძილზე მიმდინარეობდა. გადამღები ჯგუფის წევრები სხვადასხვა ქვეყნიდან იყვნენ: მსახიობები საქართველოდან, პროდიუსერები - ამერიკიდან და კანადიდან, ფოტოგრაფი- ჩილედან.
„გადაკარგულები" ფსიქოლოგიური დრამაა, მაგიური რეალიზმის ელემენტებით. ფილმი ახალგაზრდა წყვილის - თინასა და სანდროს ურთიერთობას ეხება. გოგონა თბილისიდან არაბეთის გაერთიანებულ ემირატებში გადადის საცხოვრებლად და მათი ურთიერთობა მთავრდება. სანდრო თინას დაბრუნებას ცდილობს და მას აბუ-დაბიში ჩააკითხავს. ქალაქგარეთ გასვლისას ისინი ერთ მიყრუებულ სოფელში აღმოჩნდებიან, სადაც განვითარებული მოვლენები თბილისში გატარებულ დროს ახსენებთ.
„გადაკარგულებს" 2014 წლის დეკემბერში თბილისის საერთაშორისო კინოფესტივალზე სპეციალურ სექციაში „ქართული პანორამა"აჩვენებენ.
