საპარლამენტო უმრავლესობის წევრის ოთარ ჩრდილელის განცხადებით, ათი წლის ბიჭის გაუპატიურებაში ბრალდებული 46 წლის მამაკაცის საქმეში პროკურორმა თინათინ ზუბაშვილმა უფრო მეტი დამაჯერებლობა უნდა შეიტანოს.
როგორც დეპუტატმა „რეპორტიორს" განუცხადა, საზოგადოების გარკვეული ნაწილისათვის და პირადად მისთვის, როგორც პარლამენტის ადამიანის უფლებათა დაცვის და სამოქალაქო ინტეგრაციის კომიტეტის წევრისთვის, ყოვლად მიუღებელია ასეთ სენსიტიურ თემაზე- პროკურორ ზუბაშვილის არადამაჯერებელი განმარტება. აუცილებელია პროკურორმა, უფრო მეტი სიცხადე შეიტანოს თავისივე განცხადებაში, რის შემდეგაც არ იქნება ინსინუაციების ცუნამი", - აცხადებს ჩრდილელი.
შეგახსენებთ, რომ ათი წლის ბიჭის გაუპატიურებაში ბრალდებულ 46 წლის მამაკაცს, გურჯაანის რაიონულმა სასამართლომ 1,6 წლით თავისუფლების აღკვეთა მიუსაჯა. მამაკაცი ამნისტირებულია და სასჯელაღსრულების დაწესებულება 2012 წლის საპარლამენტო არჩევნების შემდეგ დატოვა. როგორც პროკურორმა თინათინ ზუბაშვილმა კახეთის საინფორმაციო ცენტრს განუცხადა, მამაკაცს წაყენებული ბრალი შეუმსუბუქდა.
