ყველამ კარაგდ ვიცით, თუ რაოდენ  საყვარელია ბაშვებისთვის ტკბილეული, ის ხომ მათი განუყოფელი  ნაწილია. არადა, შაქრის მავნებლობა უკვე აღარავისთვის წარმოადგენს საიდუმლოს. მაშ როგორ უნდა დავიცვათ ბავშვები ამ მავნე ჩვევისგან?

აკრძალვა ყველაზე მარტივი გზაა, მაგრამ ტკბილეულის სრულად გამორიცხვა ბავშვის მენიუდან არანაკლებ უსიამოვნებებს მოგიტანთ. ბავშვი განერვიულდება და ნორმალურ საკვებზეც უარს იტყვის ან, უბრალოდ, ხასიათი გაუფუჭდება, რაც ძილზეც უარყოფითად იმოქმედებს.

ჩანაცვლება საუკეთესო ვარიანტია, რაც ადვილი არ გახლავთ. თუმცა ადვილი საქმე და ბავშვის მოვლა სულ სხვადასხვა ცნებებია.

ისღა დაგრჩენიათ, თავად შეუდგეთ უსაფრთხო ტკბილეულის შინ დამზადებას. შოკოლადზე ბევრად უსაფრთხოა შინაური სუფლე, მუსი და ცოტა შაქარში ამოვლებული თხილი თუ ნიგოზი. შეგიძლიათ, შოკოლადის ასოციაცია კაკაოთი "გააღვიძოთ".

ზაფხული რომ მოდის და ნაყინის ბიზნესი იფურჩქნება, ეს იმას არ ნიშნავს, რომ თქვენი მაცივარიც ნაყინით უნდა გაივსოს. ზაფხულიდან ზაფხულამდე ბავშვს ნაყინის გემო და მისი ჭამის ჩვევა ავიწყდება. ხელმეორედ ნუ წაახასალისებთ და ჩვევად ნუ უქცევთ ნაყინის ჭამას. კვირაში 2-3-ჯერ საკმარისია, უკიდურეს შემთხვევაში, დღეში ერთი ცალი.

ნაყინის ჩასანაცვლებლად იოგურტები ან ლამაზად შეფუთული ხაჭოს დესერტები გამოიყენეთ. მართალია, გაცილებით ძვირია, მაგრამ ღირს. სამაგიეროდ, მათი ეტიკეტებიც შეისწავლეთ. თუ შაქრის მაღალი შემცველობა, საღებავები, ემულგატორები და კონსერვანტები "მოჰყვება", ისევ ჯობია, ნაყინი ჭამოს.

მეტი გადამჭრელი ზომების მიღება მოგიწევთ ტკბილ გაზიან სასმელებთან მიმართებაში. მშობლის ყველა "ჯადოსნური" ხერხი გამოიყენეთ და ისინი კომპოტებით ან წვენებით ჩაანაცვლეთ. ეს არც ისე რთულია, ნუ იყიდით ამ სასმელებს ოჯახში და ბავშვიც აღარ მიეჩვევა მათ.

( მოამზადა  ნინო  მჟავანაძემ )

(წყარო  mshoblebi.ge )