აჭარის ავტონომიურ რესპუბლიკაში უკრაინის საკონსულო დაიხურა. უკრაინის საპატიო კონსული ალექსანდრე აკიმოვი დღეს აჭარის მთავრობის თავმჯდომარეს არჩილ ხაბაძეს შეხვდა და რეგიონში ჩატარებული საქმიანობა შეაჯამა.
ალექსანდრე აკიმოვმა საკონსულოს დახურვის მიზეზად უკრაინაში შექმნილი სოციალურ-ეკონომიკური მდგომარეობა დაასახელა.
კონსულმა აღნიშნა, რომ უკრაინის ოფიციალური წარმომადგენლობა ბათუმში სავარაუდოდ, რამდენიმე წელიწადში გაიხსნება.
როგორც არჩილ ხაბაძემ შეხვედრის შემდეგ განაცხადა, უკრაინის საკონსულოს დახურვა გაართულებს ურთიერთობებს როგორც მთლიანად უკრაინასთან, ისე მის ცალკეულ რეგიონებთან.
მადლობა მინდა გადავუხადო კონსულს მუშაობისთვის. ძალიან რთული იქნება ალბათ მის გარეშე უკრაინასთან ურთიერთობა. მისი დახმარებით უკრაინის რეგიონებთან სხვადასხვა მიმართულებით ვმუშაობდით. გადაწყვეტილება მიიღო უკრაინის მთავრობამ, კიდევ 20-მდე საკონსულო გაუქმდა და, ჩვენი ინფორმაციით, ეს უკავშირდება ფინანსურ საკითხებს. შევაჯამეთ ჩვენი მუშაობა და სამომავლოდ როცა გამოსწორდება სიტუაცია უკრაინაში, იმედი გვაქვს, განახლდება ურთიერთობა", - აღნიშნა არჩილ ხაბაძემ.
მისივე თქმით, ბოლო წლებში გააქტიურდა როგორც ტურისტული, ასევე ბიზნესურთიერთობები ბათუმსა და უკრაინის ცალკეულ რეგიონებს შორის, რის გამოც სამომავლოდ აუცილებელი გახდება საკონსულოს გახსნა.
