„მე პატარა ქართველი ვარ, კავკასიის მთების შვილი

და განცხრომით სხვაგან ყოფნას - მირჩევნია აქ სიკვდილი!

ქართლ-კახეთი, იმერეთი, გურია და სამგრელო -

ყველა ჩემი სამშობლოა, საყვარელი საქართველო..."

1867 წლის 26 ოქტომბერს სოფელ სუჯუნაში დაბადებულა ქართველი მწერალი და საზოგადო მოღვაწე დუტუ მეგრელი (დიმიტრი ხოშტარია).

ჯერ ქუთაისის გიმნაზიაში ისწავლა, მერე ნოვოროსიის (ოდესის) უნივერსიტეტის იურიდიულ ფაკულტეტზე, რომლის დამთავრების შემდეგაც ერევნისა და განჯის გუბერნიებში მუშაობდა. 1917 წელს თბილისში დასახლდა და სხვადასხვა სამოხელეო საქმიანობას ეწეოდა.

ლექსების წერა დუტუ მეგრელს ახალგაზრდობიდანვე იტაცებდა და აქვეყნებდა კიდეც. მისი ზემოხსენებული ლექსი და ჩვენი უსაყვარლესი მოთხრობა „ქინაქინა" შესულია დიდი იაკობ გოგებაშვილის „დედაენაში".