საქართველოში იტალიის ელჩის ფედერიკა ფავის ინიციატივით, მარჯანიშვილის თეატრის სცენაზე ქართველი ქალბატონები ძალადობის მსხვერპლი იტალიელი ქალების ისტორიებს წაიკითხავენ.
ეს ისტორიები ერთ წიგნად იტალიელმა ჟურნალისტმა სერენა დანდინიმ შეკრა. მას შემდეგ ისტორიებს მსოფლიოს სხვადასხვა სცენაზე მსახიობი ქალები კითხულობენ. პროექტში მონაწილეობდნენ კლაუდია კარდინალე, მარინა აბრამოვიჩი.
იტალიის ელჩის ინიციატივით, საქართველოში მსახიობების ნაცვლად ძალადობის მსხვერპლი ქალების პირველ პირში მოყოლილ ისტორიებს სხვადასხვა სფეროში მოღვაწე ცნობილი ქალბატონები წაიკითხავენ, მათ შორის პირველი ლედი მაკა ჩიჩუა, თეა წულუკიანი, მაია ფანჯიკიძე, მაია ასათიანი, ნინო სუხიშვილი.
საქართველოში პერფომანსის განხორციელების იდეა ფედერიკა ფავის ექვსი თვის წინ გაუჩნდა და მისი პრეზენტაცია ზუსტად ქალებზე გახშირებული ძალადობის ფაქტებს დაემთხვა.
28 ოქტომბერს მარჯანიშვილის თეატრის სცენაზე პროექტის დრესკოდის თანახმად, შავ ტანსაცმელსა და წითელ ფეხსაცმელში შემოსილი 17 ქალბატონი 17 მოკლული ქალის ნამდვილ ამბავს მოგითხრობთ.
