ბათუმში, „ნაციონალური მოძრაობის" ოფისთან მომხდარ სიტყვიერ და ფიზიკურ დაპირისპირებაში მხარეები ერთმანეთს ადანაშაულებენ.
„ნაციონალური მოძრაობის" ბათუმის ორგანიზაციის ხელმძღვანელმა გიორგი კირთაძემ ჟურნალისტებს განუცხადა, რომ აქციის მონაწილეებმა მოაწყეს პროვოკაცია, სიტყვიერი შეურაცხყოფა მიაყენეს პარტიის წევრებს, რის შემდეგაც მოხდა ფიზიკური დაპირისპირება. მისი თქმით, „ნაციონალური მოძრაობის" ოფისებთან გამართული აქციები სახელმწიფო უშიშროების სამსახურის მიერ არის ორგანიზებული.
„უნდათ აჩვენონ, თითქოს „ნაციონალური მოძრაობის" ოფისებთან ხდება დაძაბულება, რაც ბუნებრივია არ არის სწორი. ამბობენ, რომ თითქოს ჩვენ არ გვაქვს უფლება გავაპროტესტოთ აფხაზეთის ანექსია ან ვთქვათ, რომ პუტინი არ არის კარგი კაცი. აქ სულ რამდენიმე ადამიანია მოსული. მას შემდეგ, რაც მიხვდნენ, რომ ხუთი კაცით შთამბეჭდავ აქციას ვერ ჩაატარებდნენ, მოაწყეს პროვოკაცია, შეიგინეს და ცხადია ახალგაზრდა ბიჭები ამაზე თავს ვერ შეიკავებდნენ. მოხდა ფიზიკური დაპირისპირება და ეს ყველაფერი ორგანიზებული იყო სახელმწიფო უშიშროების სამსახურის მიერ", - განაცხადა გიორგი კირთაძემ.
პოლიტპატიმრის სტატუსით გათავისუფლებული პირები კი პროვოკაციის მოწყობასა და ჩხუბის დაწყებაში „ნაციონალური მოძრაობის" წევრებს ადანაშაულებენ. პოლიტპატიმრის სტატუსით გათავისუფლებულმა ჯემალ დუაძემ ჟურნალისტებს განუცხადა, რომ „ნაციონალური მოძრაობას" ხელისუფლებაში დაბრუნება უნდა, რასაც ისინი არ დაუშვებენ.
„ამათ უნდათ ხელისუფლებაში დაბრუნება, უნდათ ქვეყანა დააბრუნონ გამაუპატიურებელი ხელისუფლების ქვეყანაში, რასაც ჩვენ არ დავუშვებთ. ამ წუთშიც მოაწყეს პროვოკაცია და საკრებულოს მოქმედი დეპუტატი ნოდარ დუმბაძე ფიზიკურად გაუსწორდა ჩვენს აქტივისტს ჯიმშერ კურცხალიძეს. ეს არის მათი მართვის სტილი, ასე მართავდნენ ისინი ქვეყანას 9 წლის განმავლობაში", - განაცხადა ჯემალ დუაძემ.
