თბილისის მე-10 მოდის კვირეულის ფარგლებში დიზაინერმა თამუნა ინგოროყვამ 2015 წლის გაზაფხული-ზაფხულის კოლექცია წარმოადგინა.

ჩვენება „Tbilisi Rooms Hotel"-ში გაიმართა და მას უამრავი სტუმარი ესწრებოდა. სადა, ჰაეროვანმა და ყვავილების პრინტით გაფორმებულმა კაბებმა საზოგადოების მოწონება დაიმსახურა.

მოდის კვირეულის დასკვნითი ჩვენება კი ავთო ცქვიტინიძემ გამართა, რომელმაც თავისი კოლექციის უკეთ წარმოსაჩენად ისტორიული შენობის, „შატო მუხრანის" მე-19 საუკუნეში აგებული მარანი აირჩია.

მოდის კვირეულზე ტრადიციულად, ახალბედა დიზაინერთა კონკურსი ჩატარდა, რომელშიც  12 დამწყები დიზაინერი იღებდა მონაწილეობას. საერთაშორისო ჟიურიმ გამარჯვებულად სალი ფანგანი დაასახელა.