„რია ნოვოსტი"-ს ცნობით, აფხაზეთის ე.წ. პრეზიდენტის რაულ ხაჯიმბას განკარგულებით, იმ სახსრების ხარჯვა შემოწმდება, რომლებსაც ხელისუფლება 2005 წლიდან რუსეთიდან რესპუბლიკის სოციალურ-ეკონომიკური განვითარებისთვის იღებდა.

2011 წლის იანვარში რუსეთის კონტროლის პალატამ საბიუჯეტო სახსრების შემოწმების შედეგად, აფხაზეთისთვის ფინანსური დახმარების საკითხში 346,8 მილიონი რუბლის დარღვევა აღმოაჩინა.

„30 მილიარდი რუბლი, რომელიც აფხაზეთმა ბოლო წლების განმავლობაში მიიღო, ხალხისთვის სწორად რომ გადანაწილებულიყო, ეს მათთვის დიდ შედეგს მოიტანდა", - განაცხადა ხაჯიმბამ.

ხაჯიმბა დარწმუნებულია, რომ პროკურატურა ეფექტურად იმუშავებს და უახლოეს მომავალში დარღვევებს გამოავლენს.

აფხაზეთის ე.წ.პრეზიდენტის თქმით, მან განკარგულება გასცა, ყველა ორგანო შემოწმდეს, ვინც ამასთან კავშირშია, მათ შორის დე-ფაქტო პრეზიდენტის ადმინისტრაცია.

მედიის ინფორმაციით, 2005-2012 წლებში აფხაზეთმა რუსეთისგან ფინანსური დახმარების სახით 16 მილიარდი რუბლი მიიღო.