ყველას გვიყვარს შოკოლადი, მაგრამ თავს ვიკავებთ, რომ არ მოვიმატოთ წონაში. ამიტომ ბირმინგემის უნივერსიტეტის თანამშრომლებმა გამოიგონეს შოკოლადი, რომელშიც საერთოდ არ არის ცხიმი.

ცნობილია, რომ დასავლეთის საზოგადოება ჭარბი წონისგან მეტისმეტად არის შეწუხებული. უკანასკნელი 10 წლის მანძილზე ორჯერ გაიზარდა მსუქანი ბავშვების რაოდენობა, ხოლო მოზრდილებში ეს პრობლემა ყოველ მეოთხეს აწუხებს. ამიტომ მეცნიერები თავს იმტვრევენ დაბალკალორიული პროდუქტების შექმნის ამოცანაზე.

უცხიმო შოკოლადის 60 პროცენტი წყლისგან შედგება - ის იკავებს კაკაოს ცხიმის ადგილს. მეცნიერები ამტკიცებენ, რომ ორგანოლეპტიკური მაჩვენებლებით - სუნით, გემოთი და ფერით ახალშექმნილი პროდუქტი ძნელად გაირჩევა ჩვეულებრივისაგან.

მთელი საიდუმლო მომზადების ტექნოლოგიაშია. თხევადი შოკოლადი შეიძლება ისე შევურიოთ წყალს, ჰაერს და სპეციალურ გელს, რომ მათი მოლეკულები შეცვლიან კაკაოს ცხიმის მოლეკულებს. ასევე შეიძლება მომზადდეს 5-პროცენტიანი მაიონეზი.

ახალი ტექნოლოგიით შეიძლება შეიქმნას პროდუქტები მარილის მცირე შემცველობით ისე, რომ გემო არ შეიცვალოს. ასეთი მეთოდით მარილის რაოდენობის შემცირება შეიძლება 80 პროცენტით.

მეცნიერები თვლიან, ამგვარად შეიძლება ერის ჯანმრთელობის მდგომარეობის გაუმჯობესება და სიმსუქნის პრობლემის დაძლევა.

თუმცა, ჩვენი "გაუნათლებელი" გონება თვლის, რომ ეს პროდუქტები უგემურია, ხოლო სიმსუქნეს უნდა ვებრძოლოთ არა ტახტზე წოლით ამ შოკოლადით ხელში, არამედ მეტი მოძრაობით, ვარჯიშით, ბევრი ხილით და ბოსტნეულით.

(მოამზადა ნინო მჟავანაძემ)

(წყარო  eva.ge )