თბილისის საკრებულოს წევრი, კახა კუკავა თბილისის მერსა და დედაქალაქის ხელისუფლებას გადადგომისკენ მოუწოდებს. ამის შესახებ პარტია „თავისუფალი საქართველოს" ლიდერმა საკრებულოში რიგგარეშე სხდომის დასრულების შემდეგ განაცხადა.
მისი თქმით, „თავისუფალი საქართველო" მხარს უჭერს პოლიტიკურ ძალათა ბალანსის შეცვლას, „ნაციონალური მოძრაობის" ოპოზიციაში გადასვლას და მოუწოდებს დედაქალაქის მერს, მანამდე გადადგეს, სანამ თავად საკრებულო აიძულებს დატოვოს ეს თანამდებობა.
კუკავას განცხადებით, დედაქალაქის ბიუჯეტი უნდა ხმარდებოდეს თბილისის ინტერესებს და არა გიგი უგულავას სტრიპტიზ ბარებში სიარულს. კუკავას თქმით, საშემოდგომო სესიაზე, საქართველოს პარლამენტი განიხილავს კანონპროექტს, რომლითაც საკრებულოს უფლებამოსილება მერიასთან შედარებით გაიზრდება.
გიგი უგულავას თანამდებობიდან გადაყენების საკითხის განხილვას თბილისის საკრებულოს დეპუტატი ზაზა გაბუნიაც ადასტურებს.
მისი თქმით, კანონში ბევრი რამ გადაიხედება და შეიცვლება, რათა საკრებულოს დაუბრუნდეს ის წართმეული უფლებები, რომელიც ჰქონდა.
რაც შეეხება, თბილისის მერის გიგი უგულავას გადაყენების საკითხს, ზაზა გაბუნიამ დაადასტურა, რომ ეს თემა ნამდვილად განიხილება, მაგრამ საშემოდგომოდ.
„ შესაძლოა, საკრებულოს თბილისის მერის გადაყენების უფლებაც მიეცეს. ეს არის საკონსულტაციო საკითხი და საშემოდგომო მსჯელობის საგანი", - აღნიშნა ზაზა გაბუნიამ.
