„გათოვლიანების ახალმა სისტემამ ახალი შესაძლებლობები მოიტანა და გუდაურში ყველა პირობაა საიმისოდ, რომ თანამედროვე სტანდარტის სასტუმროები აშენდეს", - ამის შესახებ პრემიერ-მინისტრმა ირაკლი ღარიბაშვილმა ახალ გუდაურში, კომპანია „რედკოს" სასტუმროს ტიპის საცხოვრებელი კომპლექსის დათვალიერებისას განაცხადა.
ღარიბაშვილის თქმით, სასიხარულოა, რომ გუდაურში, სასტუმროებთან ერთად, უკვე აპარტოტელებიც შენდება.
პრემიერ-მინისტრის პრესსამსახურის ინფორმაციით, დეველოპერულმა კომპანიამ "რედკო" გუდაურში ინვესტირება 2 წლის წინ დაიწყო. პირველი კომპლექსი 2013 წლის დეკემბერში გაიხსნა და მისი საინვესტიციო თანხა 6 მილიონი დოლარია. მეორე და მესამე პროექტების მშენებლობა 2014 წელს დაიწყო, რომელთა საინვესტიციო თანხა 9 მილიონ დოლარს შეადგენს. 2015 წელს კი კომპანია გუდაურში 20 მილიონი დოლარის ინვესტირებას გეგმავს.
