საქართველოს შინაგან საქმეთა მინისტრი, ირაკლი ღარიბაშვილი "ნაციონალური მოძრაობის" ერთ-ერთი საპრეზიდენტო კანდიდატის, დავით ბაქრაძის შესახებ ფარული ვიდეომასალის არსებობას არ ადასტურებს. როგორც ირაკლი ღარიბაშვილმა ბათუმში ჟურნალისტებს განუცხადა, მისი ინფორმაციით, დავით ბაქრაძის შესახებ ფარული ვიდეოჩანაწერი არ არსებობს. "მე არ მინახავს დავით ბაქრაძის ვიდეომასალა, ფიზიკურად დრო არ მქონდა. ვიცი, რომ იქ არაფერი არ არის დავით ბაქრაძეზე, თუმცა არ ვიცი საიდან აქვს თვითონ ბაქრაძეს ეს ინფორმაცია", - აღნიშნა ირაკლი ღარიბაშვილმა. შეგახსენებთ, დავით ბაქრაძის ინფორმაციით, ფარულ ვიდეომასალებს შორის მისი ცხოვრების ამსახველი ჩანაწერებიცაა. ამის შესახებ ბაქრაძემ გადაცემა "ღია ეთერში" განაცხადა და იქვე განმარტა, რომ ამის თაობაზე ინფორმაცია იმ კომისიის წევრისგან მიიღო, რომელსაც აღნიშნულ ფირებთან შეხება ჰქონდა.
