საქართველოს ფინანსთა მინისტრსა და მსოფლიო ბანკს შორის საფინანსო ხელშეკრულება დაიდო. მსოფლიო ბანკის რეგიონალური დირექტორი, ჰენრი ქერალი საქართველოს კონკურენტუნარიანობისა და ეკონომიკური ზრდისთვის 60 მილიონ დოლარს გამოყოფს. ეს არის სამწლიანი ღონისძიების მეორე ნაწილი, რომელიც ქვეყანაში ზოგადად ეკონომიკური გარემოს მხარდასაჭერად შეიქმნა.
„ჩვენ სამოც მილიონს მივიღებთ, რომლის დიდი ნაწილი განსაკუთრებით შეღავათიანი ფინანსური რესურსი იქნება. იმედი მაქვს, რომ აღნიშნული ტიპის დაფინანსებას მსოფლიო ბანკი გააგრძელებს რათა საქართველოს ეკონომიკა უფრო კონკურენტუნარიანი გახდეს."- განაცხადა ნოდარ ხადურმა.
მსოფიო ბანკის რეგიონალური დირექტორის, ჰენრი ქერალის განმარტებით, მსგავსი ტიპის დაფინანსება ძალიან მნიშვნელოვანია საქართველოს განვითარებისთვის. პროექტი ქვეყანაში ახალი სამუშაო ადგილების შექმნასა და სიღარიბის წინააღმდეგ ბრძოლას უზრუნველყოფს.
„აღნიშნული თანამშრომლობა ქვეყნის გარეთ კონკურენტუნარიანობის ზრდაზე არის ორიენტირებული. პროგრამაში საქართველოს მთავრობის აქტიური ჩართულობა მისი გავნითარების გარანტიაა".-აღნიშნა ჰენრი ქერალმა.
