დღეს ყველა ბომბზე აფეთქებული სიმართლის მეგობარია, თუკი იური ვაზაგაშვილს ხელისუფლებაში ამდენი მეგობარი ჰყავდა და ვერ მოახერხეს ამ ადამიანის სიცოცხლის დაცვა, ეს ნიშნავს, რომ „ოცნებას" დედა აღარ ჰყავს, ხელისუფლებაში მკვლელია ჩანერგილი, ახლა კი კეთილი ინებეთ და გამოიძიეთ, ვინ არის თქვენს შორის ჩანერგილი, რომელიც ქვეყანას უმართავი ქაოსისკენ მიაქანებს. ახლა იძახეთ, - დედობის ეტალონი, ირინე ენუქიძე მოგვიკლეს, ახლა მამობის ეტალონი იური ვაზაგაშვილი აგვიფეთქეს და ამას აღარ დავუშვებთო. უკვე ჩაისვარეთ, უკვე შექმენით მამობის ეტალონის შვილის საფლავზე აფეთქების ფაქტი, გაიხსნება კი იური ვაზაგაშვილის საქმე? ეს კითხვა ძალიან ბევრს აწუხებს. ხომ არ აღმოჩნდება ეს საქმეც ზურაბ ჟვანიას მკვლელობისა თუ უბედური შემთხვევის „ქეისის" გვერდით...
„ალია" პოლიტიკოსებს დაუკავშირდა, თუმცა პირველად ჩვენი საუბარი ლევან გაჩეჩილაძესთან გაიმართა, რომელსაც სიკვდილის წინ იური ვაზაგაშვილი მიმართავდა, „სად ხარ ლევან, ხმა ამოიღე, თქვი რამე, ჩემი შვილის პლაკატებით მოსულო ხელისუფლებავ, გამეცით პასუხი, რატომ მუშაობენ დღეს ჩემი შვილის მკვლელები მაღალ თანამდებობებზე..." ამ კითხვას მის სიცოცხლეში პასუხი არავინ გასცა. ლევან გაჩეჩილაძემ ჩვენთან საუბარში განაცხადა,რომ საჯაროდ კომენტარის გაკეთება არ სურს ამ საკითხზე, იური ვაზაგაშვილი მტკივა, მას ახლოს ვიცნობდი, ეს არის საშინელი ტრაგედია, ძალიან გთხოვთ, ნუღარაფერს ჩამეკითხებით, ინტერვიუს ვერ მოგცემთო.
პარლამენტარი ზაქარია ქუცნაშვილი სკანდალური განცხადებით გამოვიდა, მე ვიცი, ვინ არის მოწმე, ვისზეც ბატონი იური საუბრობდაო.
„ალია" მასაც დაუკავშირდა:
- თქვენ მტრებს მიმართეთ და განაცხადეთ, „მინდა ჩვენი მტრები გავაფრთხილო, იურის მოკვლით მოგვაყენეს ტკივილი, მაგრამ ვერ გავჩერდებით". აქამდე რატომ იყავით ჩუმად? საიდან გაქვთ ინფორმაცია მოწმის შესახებ?
- მე ვიცი, ვინც არის მოწმე და ვისზეც იური საუბრობდა, სად იმყოფებოდა და რა ინფორმაციას ფლობს. თუმცა ამ ეტაპზე, გამოძიების ინტერესებიდან გამომდინარე, გვარს არ დავასახელებ. 18 იანვარს ბატონი იური ბებიაჩემის პანაშვიდზე იმყოფებოდა, მან გამიყვანა და ცალკე დამელაპარაკა. მომიყვა ყველაფერი იმ მთავარი მოწმის შესახებ, ვინ არის და სად იმყოფება.
- მთავარი მოწმე იმყოფება საზღვარგარეთ, როგორც ინფორმაცია ვრცელდება, და მან სკაიპით მისცა პროკურატურას ჩვენება.
- არ დავაკონკრეტებ ქვეყანას, რადგან ამ შემთხვევაში მთავარ მოწმეს საფრთხეს შევუქმნი.
- გარდა იმისა, რაც ჩვენ ბატონი იური ვაზაგაშვილის ინტერვიუდან შევიტყვეთ,რომ მოწმემ ბოდიში მოუხადა და პატიება სთხოვა, რა უთხრა, ვის მიერ იყო ბრძანება გაცემული ზურაბ ვაზაგაშვილისა და იმ ბიჭების ჩაცხრილვაზე?
- იურიდიულ კომიტეტზე მე მოვითხოვე საპარლამენტო კონტროლის განხორციელება სამართალდამცავ ორგანოებზე, რაც გაიზიარეს კომიტეტის დანარჩენმა წევრებმა. რატომღაც, ყველას აზრი ემთხვევა, რომ დღეს, მაქსიმუმ ხვალ, მთავარ პროკურორთან და შინაგან საქმეთა მინისტრთან, გაიმართოს სამ საკითხზე დახურულ ფორმატში შეხვედრა. არსებობს ლეგიტიმური კითხვები, მათ შორის იმასთან დაკავშირებით, რატომ დასჭირდა ორი წელი ზურაბ ვაზაგაშვილის მკვლელობის საქმის გახსნის ეტაპამდე მიყვანას, მაშინ, როცა იური ვაზაგაშვილი თანამშრომლობდა პროკურატურასთან, აწვდიდა ინფორმაციებს, ამას სჭირდებოდა შემოწმება და ინფორმაციების შედარება. მეორე საკითხი, ჩვენ გვაინტერესებს, ვინ არიან ის თანამდებობის პირები, ვისაც ამხელდა იური ვაზაგაშვილი, რომლებიც ინარჩუნებენ თანამდებობას, სამართალდამცავ სტრუქტურებში და არსებობდა ინფორმაცია, რომ სწორედ ისინი აფერხებდნენ და ფარავდნენ ამ მძიმე დანაშაულს. მე არ მინდა პრეზუმფცია დავარღვიო და უფრო შორს წავიდე. და მესამე, რა მიზნით იქნა მოკლული იური ვაზაგაშუილი. ეს არის უსერიოზულესი თემა, იმიტომ, რომ ადგილი ჰქონდა განზრახ მკვლელობას დანაშაულის დაფარვის მიზნით, ადგილი ჰქონდა მკვლელობას საზოგადოების დაშინების, პოლიტიკური და სამოქალაქო ინსტიტუტების დესტაბილიზაციის მიზნით. ეს არის ის ლეგიტიმური შეკითხვები, რომლებიც არსებობს და მე, როგორც იურის მეგობარი და ხალხის წარმომადგენელი პარლამენტში, ვითხოვ პასუხებს.
- როგორ ფიქრობთ, იური ვაზაგაშვილის მკვლელობას გადაყვება რამდენიმე მაღალჩინოსანი,ვისაც ბატონი იური მისი შვილის მკვლელების მფარველობაში ადანაშაულებდა?
- თუ დადგინდა,რომ მაღალ თანამდებობას ინარჩუნებდნენ სამართალდამცავ სტრუქტურებში ის პიროვნებები,რომლებიც ხელს აფარებდნენ, ან ბლოკავდნენ ვაზაგაშვილის საქმის გამოძიებას, ბუნებრივია, ეს საკითხი დადგება, რადგან ვიმეორებ, არ შეიძლება დანაშაულს ვებრძოლოთ დამნაშავეების ხელით. რა თქმა უნდა, მათი პასუხისმგებლობა დადგება, ვინც დამნაშავეებს ხელს აფარებდა.
- ბატონო იური მოგიყვათ,რომ 16 იანვარს ის შეხვდა ბიძინა ივანიშვილს?
- მე შემიძლია დავადასტურო, რომ ეს შეხვედრა შედგა. ერთადერთი რაც შემიძლია გითხრათ, თუ ვინმეს გული შესტკიოდა და ზურაბ ვაზაგაშვილის საქმეს განიცდიდა, ეს იყო ბიძინა ივანიშვილი. მეტს დღეს აღარაფერს გეტყვით, ამის დამადასტურებელი უამრავი სამხილი მაქვს, ერთადერთი პიროვნება, რომელსაც ყველაზე მეტად შესტკიოდა გული ვაზაგაშვილზე, ეს იყო ბიძინა ივანიშვილი. მოვა დრო და ამაზეც ვილაპარაკებ... ბიძინა ივანიშვილი ალალად ქომაგობდა იური ვაზაგაშვილის ოჯახის ტრაგედიას.
- კი მაგრამ, ვინ წავიდა ბიძინა ივანიშვილის წინააღმდეგ, რა გახდა საქმის გაჭიანურების მიზეზი?
- ეს მე არ უნდა მკითხოთ, მე არც შინაგან საქმეთა მინისტრი გახლავართ და არც ყოფილი მთავარი პროკურორი.
„ალია" დაუკავშირდა ყოფილ მთავარ პროკურორს არჩილ კბილაშვილს:
- ბატონო არჩილ, თქვენ გაქვთ ინფორმაცია რა ხდება ვაზაგაშვილის საქმეზე?
- რა თქმა უნდა მაქვს ინფორმაცია, მაგრამ ახლა მე პროკურორი არ ვარ და არ მაქვს უფლება, ამ საქმესთან დაკავშირებით გავაკეთო რაიმე განცხადება. ამის უფლება აქვს პროკურორს, რომელიც გამოძიების ინტერესებიდან გამომდინარე აკეთებს, ან არ აკეთებს განცხადებას. მე ახლა ვარ მხოლოდ ინფორმაციის მფლობელი და მაქვს ვალდებულება, რომ ეს ინფორმაცია არ გავაჟღერო. აქედან გამომდინარე, კანონით არ მაქვს უფლება, ამ საქმის გარემოებებზე ვისაუბრო.
- ბატონო არჩილ, ჩვენთვის ცნობილი ხდება, რომ ბიძინა ივანიშვილი ქომაგობდა ზურაბ ვაზაგაშვილს და გული შესტკიოდა მისი ოჯახის ტრაგედიაზე. კორტების საქმის გამოძიება თქვენს დროს დაიწყო?
-აკრძალულ პასუხთა სიაში ეს კითხვაც შედის,. მე მხოლოდ ერთს გიპასუხებ, მაქვს ინფორმაცია, მაგრამ ამავდროულად მაქვს გამჟღავნების აკრძალვის ვალდებულება.
- თქვენი პროკურორობის დროს, ამ საქმის გამოძიების ხელშემშლელი ფაქტორები არსებობდა?
- ესეც აკრძალულ პასუხთა შორის არის...
- თქვენ არც მიდასტურებთ და არც უარყოფთ, რომ ხელს გიშლიდნენ გამოძიების პროცესში?
- გიმეორებთ, ესეც აკრძალულ პასუხთა შორის არის...
ჩვენ ასევე ჩავწერეთ ინტერვიუ სოზარ სუბართან, რომელიც 2006 წელს, სახალხო დამცველი იყო და „კორტების სპეცოპერაცია" ბიჭების საზარელ დახვრეტად შეაფასა...
- თქვენ სახალხო დამცველობის დროს, „კორტების სპეცოპერაცია" შეაფასეთ ბიჭების დახვრეტად. რა ხდებოდა მაშინ?
- მაშინ ჩვენ მოვითხოვეთ ალტერნატიული ექსპერტიზის ჩატარება, რა თქმა უნდა, ამის უფლებას არ გვაძლევდნენ, თუმცა წავედით შანტაჟის გზით და ვთქვი, რომ არ წავალთ ადგილიდან, სანამ არ მოგვცემთ ალტერნატიული ექსპერტიზის ჩატარების საშუალებას და აი, რა დავადგინეთ: როცა ამბობდნენ, რომ მანქანის შიგნიდან გარეთ იყო ნასროლი, სინამდვილეში აღმოჩნდა, რომ ტყვიის მიმართულება იყო გარედან შიგნით, მანქანის სალონში. უკანა საქარე მინის მარჯვენა ზედა კუთხე იყო ჩატეხილი. ამბობდნენ, მინა მერე ჩატყდა და აქ იყო ნასროლიო. ჩვენ მაშინ არ მოგვცეს სურათები, სადაც შუშა პირდაპირ ჩანდა, მაგრამ ჩანდა უკან კაპოტზე შუშის ანარეკლი, საიდანაც ნათლად დგინდებოდა, რომ საქარე მინა საერთოდ არ იყო ჩატეხილი და ზედ არანაირი ნატყვიარი არ იყო, არც შემავალი და არც გამავალი. ჩვენ ასევე დავადგინეთ, რომ მანქანის საზურგეზე არ იყო დენთის კვალი, მაშინ ზურა ადეიშვილი მეუბნებოდა ამ საქმესთან დაკავშირებით, ხელის ანაწმენდები ავიღეთ და ბიჭებს დენთის კვალი ჰქონდათო, დენთის კვალი კი ვერ გაჩნდებოდა, თუ არ ისროდნენ, მაგრამ რომ ესროლათ საზურგეზეც აუცილებლად იქნებოდა დენთის კვალი. ფაქტი იყო, რომ გააყალბეს ექსპერტიზა, ბოლოს და ბოლოს სხვას აუღებ სინჯს და მაგათთვის ამის გაყალბება პრობლემა არ იყო. საქმე ისაა, შემდგომ მათ არ მიაქციეს იმას ყურადღება, რომ საზურგეზეც გაეჩინათ დენთის კვალი. ამის შემდეგ ჩვენ რომ ჩავატარეთ ექსპერტიზა, დადგინდა, რომ საზურგეზე დენთის კვალი არ არსებობდა. უტყუარი მტკიცებულება გვქონდა, რომ საქმე შეგნებულად იყო გაყალბებული.
- ბატონო სოზარ, იური ვაზაგაშვილის დიდი ძალისხმევაც იყო, რომ თქვენ მოსულიყავით ხელისუფლებაში. ამ კაცმა 300 ათასი ხელმოწერა მოუგროვა ბიძინა ივანიშვილს, რომ მისთვის მოქალაქეობა აღედგინათ. ბოლოს ამბობდა, ეს ხელისუფლება ჩემი მეგობარი მეგონა და მოღალატეები აღმოჩნდნენო. იური ვაზაგაშვილის ბომბზე აფეთქება იყო მაინცდამაინც საჭირო, რომ გამოფხიზლებულიყვნენ პოლიტიკოსები და სამართალდამცავი სტრუქტურა? რატომ ვერ გამოიძიეთ ორი წლის განმავლობაში ეს საქმე? თანაც ეს ადამიანი აცხადებდა, ჩემი შვილის მკვლელები დღესაც ძალოვან სტრუქტურებში მუშაობენო.
- არ ვიცი, ვერ გეტყვით, ვიღაცას არ უნდოდა ამ საქმეზე რეაგირება. მაგალითად, მე გეტყვით, ჩემთან დაკავშირებით რაც მოხდა. მე და იური ძალიან ვმეგობრობდით. როცა სასჯელაღსრულების მინისტრი ვიყავი, ერთ კონკრეტულ ადამიანზე, რომლის სახელსაც არ დავასახელებ, მაშინ მეუბნებოდა, ჩემი შვილის სპეცოპერაციაში მონაწილე ადამიანი შენთან მუშაობსო. ლაპარაკი არ არის იმ პიროვნებაზე, რაც ბოლოს დაიბეჭდა. მე შეგნებულად გვარს არ ვასახელებ და ნუ მომთხოვთ დაკონკრეტებას. როცა დავიბარე იგი, კონკრეტული მასალებით დამიმტკიცა შემდეგი: კი, ნამდვილად ვმონაწილეობდი კორტების სპეცოპერაციებში, იმიტომ, რომ დამავალესო, მის რაზმთან ერთად იმყოფებოდა სამგორში, სადაც თითქოსდა ესენი უნდა მისულიყვნენ და როცა ეს სროლა ატყდა, ის იმყოფებოდა იმ მომენტისთვის სამგორში და არ იცოდა სროლების შესახებ. მან სროლის ხმა გაიგონა შორიდან და მერე მივიდა ადგილზე. ამის შესახებ იურის ვესაუბრე და ავუხსენი, თუმცა ის ადამიანი თავისი ნებით წავიდა სამსახურიდან. მან მითხრა, ვიცი თქვენი და იურის ურთიერთობა და ჩემი აქ ყოფნით ხელს არ შეგიშლიო.
- ამ ადამიანმა რა გითხრათ, ვისგან მოდიოდა დავალება?
- მან მიპასუხა, რომ ამის შესახებ არაფერი იცოდა.
- როცა თქვენ ამ საქმეზე მუშაობდით, როგორც სახალხო დამცველი, რა იკვეთებოდა, ბრძანება ვისი გაცემული იყო, მაშინდელი შს მინისტრის, ვანო მერაბიშვილის?
- გადაჭრით არ შემიძლია ამის თქმა, მაგრამ ასეთი ტიპის სპეცოპერაციები, სავარაუდოდ, მინისტრის დონეზე იგეგმებოდა.
- ესეთი სპეცოპერაციების მიზანი რა იყო?
- პირდაპირ გეტყვით, რომ ეს იყო საზოგადოების დაშინების მცდელობა. რამდენ უდანაშაულო ადამიანს შეახოცეს ხელი და ათასი სისულელე დააბრალეს, მთავარი ის იყო, რომ ის ხელისუფლება ამას უშვებდა. გაიხსენეთ, სამი ბიჭი რომ ჩახოცეს გეგუთში, ბუტა რობაქიძეზე და გირგვლიანზე აღარაფერს ვამბობ. ეს აღარ იყო სპეცოპერაცია, ეს იყო იმ უკანონობის ირიბი შედეგი, რაც მაშინ ხდებოდა. სამგორის საქმე, ეს იყო დაგეგმილი მკვლელობა, ისევე, როგორც კორტების ოპერაცია და გეგუთი. მათ პირდაპირ მიზნად ჰქონდათ მკვლელობების ჩადენა. ის, რომ ვაზაგაშვილი და მისი თანმხლები პირები საყაჩაღოდ მიდიოდნენ, არაფრით არ დასტურდება და მეორე, რაც ასევე ტყუილი გამოაქვეყნეს, თითქოს წინა დღეებში მათ ლომბარდი დააყაჩაღეს, ეს იყო აბსოლუტური ტყუილი და შეგნებული დეზინფორმაცია ვანო მერაბიშვილის მხრიდან.
- როცა ამ საქმეს სწავლობდით, რა დაასკვენით, სამიზნედ ზურა ვაზაგაშვილი და მისი თანმხლები პირები რატომ აირჩიეს?
- ბატონ იურის ამ საკითხზე თავისი ვერსია ჰქონდა, აღარ მახსოვს გვარი, მაგრამ რომელიღაც პოლიციელს ასახელებდა და იკვეთებოდა კერძო ინტერესები. მერე გადაწყვიტეს სპეცოპერაცია, რომ ეს ბიჭები დაეხოცათ. სხვათა შორის, სახალხო დამცველობის დროს ვამბობდი და ახლაც ვიტყვი, რომ ვაზაგაშვილმა, ხუბულოვმა და ამ ბიჭებმა თავისი სიკვდილით წერტილი დაუსვეს ქუჩის მკვლელობების სერიას. იმდენად მძაფრი იყო საზოგადოების რეაქცია, სააკაშვილის რეჟიმი იძულებული გახდა, მსგავსი მკვლელობები შეეწყვიტა. რა თქმა უნდა, უკანონობა არ დამთავრებულა და სხვა ფორმით გრძელდებოდა, თუმცა ღია მკვლელობები შეწყდა. სხვათა შორის, ერთ ძალიან საინტერესო ამბავს მოგიყვებით, 2006 წლის 1-ელ მაისს, კორტების სპეცოპერაციის წინა დღეს, ვიდრე ვაზაგაშვილისა და ხუბულოვის მკვლელობა მოხდებოდა, ვანო მერაბიშვილმა შეხვედრა მთხოვა და შევხვდი. ჩვენი საუბრის თემა იყო ასეთი, ვანო მეუბნება, კი, შენ ხარ ომბუდსმენი, ვერ გეტყვით, რომ არ გაგვაკრიტიკო, მაგრამ, როცა ფაქტი ხდება, მაშინვე კრიტიკას ნუ იწყებ, მოგვეცი დრო, იქნებ საქმეს ვიძიებთ. მე ვუთხარი, როცა ფაქტი ხდება, მის კონსტატირებას ვახდენ, ვითხოვ გამოძიებას, მაგრამ მე არ ვარტყამ პირდაპირ ხელისუფლებას, თუ რატომ არ იძიებს. მან მითხრა, იქნებ თამაშის წესები დავიცვათ და რაღაცებზე შევთანხმდეთ. 2 მაისს მოხდა კორტების სპეცოპერაცია. ჩემი მხრიდან ამ შეთანხმების დაცვა ის იყო, რომ იმავე დღეს არ გავაკეთე განცხადება, დავურეკე შოთა ხიზანიშვილს, რომელიც ამ საქმის სპიკერი იყო და ვუთხარი, იცით რა, რასაც თქვენ ახლა ამბობთ, არის ტყუილი. ამ სპეცოპერაციის დროს იმყოფებოდა ადგილზე ჩემი თანამშრომელი ნათია ხაინდრავა, მან დაინახა ყველაფერი და მათ ვუთხარი, ახლა მოდით, თქვენ თვითონ გამოასწორეთ საქმე და ნუ იტყუებით, თორემ მე ნამდვილად არ გავჩუმდები-მეთქი. როცა გავიდა ორი დღე და მათ არაფერი გამოასწორეს, მე პირდაპირ ეთერში გამოვედი და ვთქვი, ეს არის ტყუილი, რასაც ამბობენ, არსებობს მოწმე, რომელიც დაადასტურებს სინამდვილეში რა მოხდა, რომელმაც პირადად დაინახა გაჩერებულ ავტომანქანას როგორ მიუახლოვდა იარაღმომარჯვებული და ამის შემდეგ როგორ გაიხსნა ცეცხლი. ნათია ხაინდრავას ამ თემაზე ჩვენება მიცემული აქვს.
ნინო სამხარაძე
გაზეთი „ალია"
