აფხაზეთის საოკუპაციო ზოლთან რუსმა ოკუპანტებმა სკოლაში მიმავალი 3 მცირეწლოვანი გაიტაცეს. შემთხვევა სოფელ წყოუსთან მოხდა.
მოსწავლეები ოკუპანტებს 5 საათის განმავლობაში საგუშაგოში ჰყავდათ დატყვევებული. ადგილობრივი მცხოვრებლების მცდელობის მიუხედავად, ბავშვების გათავისუფლება მხოლოდ მას შემდეგ მოხდა, რაც ერთ-ერთი ბავშვი შეუძლოდ გახდა.
შემთხვევის ადგილზე იმყოფებოდა იმ სკოლის დირექტორი, სადაც სამივე მოსწავლე სწავლობს.
მოსწავლეების თქმით, რუსი სამხედროები ნასვამ მდგომარეობაში იმყოფებოდნენ და მათ დასცინოდნენ.
ერთ-ერთი მოსწავლის თქმით, მას რუსმა ჯარისკაცმა 7 თვის წინ მომხდარი ამბავიც გაახსენა, როდესაც ის მის ოჯახში არყის სათხოვნელად მივიდა, მაგრამ მათ გამასპინძლება ვერ მოახერხეს.
ადგილობრივების განცხადებით, რუსები მათ ოჯახებს ხშირად აწიოკებენ. არის შემთხვევები, როდესაც მათთან შეიარაღებული ოკუპანტები მიდიან და საჭმელს და ალკოჰოლურ სასმელს ითხოვენ. ისინი ამბობენ, რომ მათ შინაური ცხოველები თითქმის არ ჰყავთ, რადგან რუსმა ჯარისკაცებმა ისინი ან მოიპარეს, ან ძალით წაართვეს.
(მოამზადა ნათია ცუხიშვილმა)
