გორის რაიონის სოფელ ჯარიაშენში ე.წ. საზღვართან სასულიერო პირები მშვიდობისათვის ღვთისმშობლის პარაკლისს ასრულებენ.
სოფლის ცენტრში ეკლესიასთან ადგილობრივი მრევლი უკვე შეიკრიბა. ჯარიაშენში გორისა და ატენის ეპარქიის მიტროპოლიტი მეუფე ანდრიაც ჩავიდა. პარაკლისის შესრულება ბოლო ერთი კვირის განმავლობაში ოკუპირებული ტერიტორიის მოსაზღვრედ მდებარე სოფელში რამდენიმე ინციდენტის დაფიქსირების შემდეგ გადაწყდა.
სოფელ ჯარიაშენის მიმდებარედ შეიარაღებულმა პირებმა სოფლის მკვიდრი, 70 წელს გადაცილებული ელიზბარ მესტუმრიშვილი დააკავეს. იგი ცხინვალის მილიციის წინასწარი პატიმრობის იზოლატორიდან სამდღიანი ტყვეობის შემდეგ გაათავისუფლეს. ამავე სოფელში კიდევ ერთი შემთხვევა მოხდა, ორმა დაკავებულმა ადგილობრივმა გამოქცევა შეძლო, თუმცა შეიარაღებულმა პირებმა მათი კუთვნილი მცირე ზომის სახნავი ტრაქტორი გაიტაცეს და მოგვიანებით დაზიანებული დააბრუნეს. მოსახლეობის თქმით, წელს კიდევ ერთხელ შეეზღუდათ საკუთარ მიწის ნაკვეთებზე წვდომა.
აღნიშნული ფაქტების გათვალისწინებით, ეპარქიის მმართველმა და სასულიერო პირებმა მშვიდობის პარაკლისის აღსრულება გადაწყვიტეს. ამ წუთებში სოფლის ეკლესიაში მეუფე ანდრია ლოცვას აღავლენს, რის შემდეგაც მრევლი და სამღვდელოება სოფლის განაპირას ე.წ. საზღვრისკენ გაემართებიან.
