"აფხაზეთსა და რუსეთს შორის საზღვრები არ უნდა არსებობდეს,"- ამის შესახებ ოკუპირებულ აფხაზეთში ვლადიმერ პუტინის თანაშემწე ვლადიმერ სურკოვმა განაცხადა.

პუტინის თანაშემწე აფხაზეთში ერთდღიანი სამუშაო ვიზიტით იმყოფებოდა, სადაც ჟურნალისტებთან საუბარში განმარტა, რომ ახალი ხელშეკრულების თანახმად, აფხაზეთსა და რუსეთს შორის საზღვრები აღარ იარსებებს.

 „ვადასტურებთ რუსეთის მიერ აღებულ ვალდებულებებს, რომელსაც ხელი მოვაწერეთ ჩვენ ახალ შეთანხმებაში. მინდა, შეგახსენოთ, რომ აფხაზეთის ფინანსირებისთვის გათვლილი იყო 4 მილიარდი რუბლი, რაც შემდეგ გაორმაგდა. დღეს რუსეთში არც ისე მარტივი ვითარებაა და ეს ყველამ კარგად ვიცით. მიმდინარეობს საბიუჯეტო დანახარჯების შემცირება. თუმცა, პრეზიდენტმა მიიღო გადაწყვეტილება, აფხაზეთთან მიმართებაში ბიუჯეტი არ შეიკვეცოს. რაც შეეხება რუსეთ-აფხაზეთის საზღვარზე გადაადგილებას, ეს საზღვარი საერთოდ უნდა მოიხსნას. ჩვენ შორის არ უნდა არსებობდეს საზღვრები, ეს ახალი შეთანხმების მიხედვით არის გათვალისწინებული," - განაცხადა ვლადიმერ სურკოვმა.

ოკუპირებული აფხაზეთის ე.წ. ლიდერმა რაულ ხაჯიმბამ კი აღნიშნა, რომ აფხაზეთში რუსეთის დახმარებით პენსიები გაიზრდება და სოციალური მდგომარეობა გამოსწორდება.

(მოამზადა ნინი მოდრეკილმა)