ანალიტიკოსი დემურ გიორხელიძე ლარის კურსის ვარდნასა და მთავრობის ინიციატივებზე საუბრობს და აცხადებს, რომ ეროვნული ვალუტა ამ მდგომარეობამდე ქართულ ეკონომიკაში ფუნდამენტური პრობლემების არსებობამ მიიყვანა. ამის შესახებ გიორხელიძე „კვირის პალიტრას" ესაუბრა.
„ეროვნული ვალუტა ამ მდგომარეობამდე მიიყვანა იმან, რომ ქართულ ეკონომიკაში ფუნდამენტური პრობლემებია. ფაქტობრივად, ვერაფერს ვაწამოებთ - ჩვენი წარმოება თხილისა და ღვინის დონეზეა დაშვებული; ექსპორტში დომინირებს მანქანების ექსპორტი, ანუ მანქანების შემოტანა და მერე გატანა, რაც ექსპორტის თითქმის 20%-ს შეადგენს. ეს ყველაფერი მიუთითებს, თუ რა კატასტროფულ მდგომარეობაშია ქვეყნის ეკონომიკა. 21-ე საუკუნეში, როცა მსოფლიოს სავაჭრო ორგანიზაციის წევრობამ თუ ევროკავშორთან ასოცირების ხელშეკრულებამ გაგვისხნა გზები, ვხედავთ, რომ ქვეყანას მოცულობით ბაზარზე გასატანი არაფერი აქვს. სახელმწიფო, რომელიც ეყრდნობა მხოლოდ იმპორტს, ბუნებრივად დგას ეროვნული ვალუტის გაუფასურების საფრთხის წინაშე.
მთავრობის ინიციატივა, რომ სავალუტო ფონდიდან მივიღებთ ტრანშს და ამით შევამცირებთ ლარზე დაწოლას, ჩემი აზრით, ერთჯერადი აქციაა. როგორც კი ამოიწურება ტრანში, პრობლემა გამწვავდება", - განაცხადა გიორხელიძემ.
(მოამზადა ნენე სტეფანიშვილმა)
წყარო: „კვირის პალიტრა"
