გავრცელებული ინფორმაციით, ზუგდიდის საქალაქო სასამართლომ დაკავებული აქციის მონაწილეები 100-100 ლარიანი ჯარიმის სანაცვლოდ გაათავისუფლა.
აქციის ერთ-ერთი ორგანიზატორი, "დაიცავი საქართველოს" ლიდერი კახა მიქაია სამართალდამცველებს გუშინდელი მობილიზებისთვის მადლობას უხდის და უარყოფს იმ მოსაზრებას, რომლის თანახმად, აქცია "ქართული ოცნების" მიერ იყო ორგანიზებული.
მიქაია ირწმუნება, რომ აქციის მონაწილეთა გაღიზიანება "ნაციონალური მოძრაობის" ლიდერების ცინიზმმა განაპირობა.
შეგახსენებთ, რომ გუშინ "ნაციონალური მოძრაობის" წევრებს აქციის მონაწილეებმა ქვები, კვერცხები და წყლით სავსე ბოთლები დაუშინეს. შსს-ს სამეგრელო-ზემო სვანეთის სამხარეო მთავარი სამმართველოს ზუგდიდის რაიონული სამმართველოს თანამშრომლებმა ზუგდიდში დრამატული თეატრის მიმდებარე ტერიტორიაზე მიმდინარე აქციის 12 მონაწილე დააკავეს.
