ახალგორის შესასვლელთან დე-ფაქტო სამხრეთ ოსეთის ხელისუფლებამ ქართულ მხარეს 19 წლის დავით ბაშარულის ცხედარი გადმოსცა. ცხედრის გადმოცემას ოჯახი ორი თვის განმავლობაში ითხოვდა. გარდაცვლილის დედის ნინო გუთნიაშვილის ინფორმაციით, მისი შვილს 9 თვის წინ ახალგორის მილიციის შენობაში სცემეს.
„მეტი არაფერი ვიცი. ოსურმა მხარემაც ჩაატარა ექსპერტიზა, თუმცა, პასუხი ჩვენთვის უცნობია. ახლა ქართული მხარე ჩაუტარებს ცხედარს ექსპერტიზას და გარდაცვალების ზუსტი მიზეზი დადგინდება", - აცხადებს გარდაცვლილის დედა.
ახალგორის მუნიციპალიტეტის გამგებლის ნუგზარ თინიკაშვილის ინფორმაციით, 19 წლის ახალგაზრდა მილიციის შენობაში აწამეს, რაც გარდაცვალების მიზეზი გახდა. მისი თქმით, ბაშარულის გარდაცვალების შემდეგ, ოსურმა მხარემ ცხედარი გადამალა და ორი თვის წინ ახალგორის სიახლოვეს ხეზე ჩამოკიდა.
დავით ბაშარული ოკუპირებული ახალგორიდან 9 თვის წინ გაუჩინარდა.
(მოამზადა ნინი მოდრეკილმა)
