ილია ჭავჭავაძის სახელობის მწიგნობართა ასოციაციის მწიგნობართა კლუბში მეცნიერთა საზოგადოებას ნაშრომი „ახალციხისა და ტაო-კლარჯეთის ეპარქია" წარუდგინეს.
წიგნი ცოტა ხნის წინ, სრულიად საქართველოს კათოლიკოს-პატრიარქის, უწმინდესისა და უნეტარესის ილია მეორის ლოცვა-კურთხევით გამოიცა და მასზე მეცნიერთა ჯგუფმა წლების განმავლობაში იმუშავა. წიგნში ახალციხისა და ტაო-კლარჯეთის შესახებ მრავალმხრივი, მრავალფეროვანი და უნიკალური მასალაა თავმოყრილი.
„რეპორტიორს" ნაშრომის რედაქტორი, ფილოლოგიის მეცნიერებათა დოქტორი, პროფესორი ვალერი ასათიანი ესაუბრა:
„დასრულდა ქართველ მეცნიერთა რამდენიმეწლიანი შრომა. შეიქმნა უზარმაზარი გამოკვლევა, რომელიც მიეძღვნა პატრიარქს. ნაშრომი გახლავთ არსებითად ქართული სულიერების ისტორიის ერთ-ერთი უმნიშვნელოვანესი მონაკვეთი. მასში თავმოყრილია უნიკალური მასალა. ჩატარდა რამდენიმე ექსპედიცია. ეს ყოველივე შეავსებს იმ მატიანეს, რასაც ჰქვია ქართული სულიერების ისტორია, ქართული ეკლესიის ისტორია, ხელოვნებისა და ლიტერატურის ისტორია და ა.შ." - განუცხადა „რეპორტიორს" ვალერი ასათიანმა.
პროექტის ავტორი და მენეჯერია ალექსანდრე ასათიანი. 1000-გვერდიანი ნაშრომი 2000-იანი ტირაჟით გამოიცა.
