ადვოკატი გელა ნიკოლაიშვილი პროკურატურაში შექმნილ ახალ დეპარტამენტს დარღვევების გამოვლენის შანსს უწოდებს, თუმცა აღნიშნავს, რომ წლების შემდეგ სამართალწარმოების პროცესში ჩადენილი კონკრეტული დარღვევების გამოძიება ძალიან რთულია. ადვოკატის თქმით, ახალი დეპარტამენტის მიმართ ხალხი იმედითაა განწყობილი.
„ეს არის შანსი, ვერ ვიტყვი, რომ ეს არის გარანტიის მომცემი, ძალიან რთულია ამდენი წლის შემდეგ ზუსტად გაარკვიო თუ სამართალწარმოების პროცესში რა კონკრეტული დარღვევები და დანაშაულებები იქნა ჩადენილი ამა თუ იმ პირის მიერ. ძნელია იმის დამტკიცება, იყო თუ არა ადამიანზე ფიზიკური ზეწოლა, წამება და არაადამიანური მოპყრობა,"- განაცხადა ნიკოლაიშვილმა „რეპორტიორის" პრესკლუბში გამართულ ბრიფინგზე.
ამასთან, ადვოკატი პრეზიდენტის მიერ სამი უვადო პატიმრობამისჯილი ქალის შეწყალებას მიესალმება და იმედს გამოთქვამს, რომ ქალბატონების მიმართ ჰუმანური აქტი ერთჯერადი არ იქნება და გარკვეული ფორმით სხვა უვადო თავისუფლებააღკვეთილებზეც გავრცელდება.
