უკრაინაში ქართული ლეგიონის მეთაური მამუკა მამულაშვილი ვერის პარკში ახალგაზრდებს შეხვდა. შეხვედრის მიზანი იმ ადამიანების გაცნობა იყო, ვისაც უკრაინაში რუსეთის წინააღმდეგ საომრად წასვლა სურს.
მამულაშვილმა დაინტერესებულ პირებს განუმარტა, რომ ამ ეტაპზე საქართველოდან მებრძოლების დამატება აუცილებლობას არ წარმოადგენს, თუმცა მოხალისეების სია მაინც შედგა. სიას უკრაინაში დაღუპული მებრძოლის, ალექსანდრე გრიგოლაშვილის მეუღლე ქრისტინე სვანიძე ადგენდა.
„შეხვედრის მიზანი იყო, ეს ადამიანები გამეფრთხილებინა, რომ საკუთარი ინიციატივით არ არის უკრაინაში ჩასვლა აუცილებელი. თუ იქნება ქართველების იქ ყოფნა საჭირო, ჩვენ თვითონ ვეტყვით,"- განაცხადა მამულაშვილმა.
უკრაინაში ქართული ლეგიონის მეთაურმა განმარტა, რომ მისი საქართვლოში ჩამოსვლა მხოლოდ უკრაინაში საომრად წასვლის მსურველებთან შეხვედრა იყო და ის 21 მარტის აქციისთვის ქვეყანაში დარჩენას არ გეგმავს.
