"ქრისტიან-დემოკრატიული მოძრაობის" პრეზიდენტობის კანდიდატი, გიორგი თარგამაძე, ბოლნისის მოსახლეობას შეხვდა. ადგილობრივების პრობლემები მოისმინა და იმ საკითხებზე ისაუბრა, რაც მოსახლეობას აწუხებს.
„ადგილობრივი მოსახლეობის ნაწილი დასაქმებულთა რაოდენობაში მიზერულად მცირეა, რაც მოსახლეობის უკმაყოფილებას იწვევს. საუბარი არ უნდა იყოს არც ერთი წარმოების არათუ დახურვაზე, არამედ პირიქით, ქვეყნის საწარმოო პოტენციალის ამოქმედებაზე, მაგრამ ეს არ უნდა ხდებოდეს მოსახლეობის ჯანმრთელობის ხარჯზე, ეს არ უნდა ხდებოდეს იმ გარემოსთვის ეკოლოგიური ზიანის მიყენების ხარჯზე, სადაც წარმოება ვითარდება, სადაც ადამიანები ცხოვრობენ. არ შეიძლება სახელმწიფომ პირად კომერციულ სარგებელს და მოგებას უფრო წინა პლანზე აყენებდეს, ვიდრე თავისი მოქალაქეებისა და მათი ოჯახების ჯანმრთელობას. არ შეიძლება წარმოების განვითარება სარგებელს არ აძლევდეს იმ სოციალურ გარემოს, სადაც უმუშევრობის მაჩვენებელი ძალიან მაღალია. ტრადიციებით ევროპისკენ სვლა უპირველეს ყოვლისა ნიშნავს იმას, რომ ბუნებრივი რესურსების ექსპლუატაცია ეკოლოგიური ზიანის მიყენებით არ უნდა ხორციელდებოდეს და ეკონომიკისა და წარმოების განვითარება სწორედ ადგილობრივი მოსახლეობის დასაქმებასა და სოციალური გარემოს გაუმჯობესებას უნდა ემსახურებოდეს." - განცხადა შეხვედრაზე თარგამაძემ.
