ექსკლუზიური ინტერვიუ თბილისის მერთან. დავით ნარმანია საკადრო ცვლილებებზე, ჯოკია ბოდოკიასთან დაკავშირებულ სკანდალზე, საკრებულოზე, ოპოზიციაზე, მერიაში ბოლო დროს განვითარებულ მოვლენებზე თბილისის მერი პირველად „პრაიმტაიმთან" საუბრობს.
- ბატონო დავით, ჯოკია ბოდოკიას დაკავების შემდეგ, მერია ხმაურისა და, შეიძლება ითქვას, სკანდალების ეპიცენტრადაც კი იქცა. ისეთი შთაბეჭდილება შეიქმნა, თითქოს, კორუფციის ბრალდებით დაკავებულმა ბოდოკიამ თანამოზიარეები დაასახელა. ეს მცდარი შთაბეჭდილებაა? იყო მაინც რაიმე კავშირი ბოდოკიას დაკავებასა და საკადრო ცვლილებებს შორის?
- ჯოკია ბოდოკია უნდა განვიხილოთ როგორც ცალკე მოვლენა. სხვა საკითხები მისგან აბსოლუტურად დამოუკიდებელი თემებია. უბრალოდ, ვინაიდან ეს დროსა და სივრცეში ერთმანეთს დაემთხვა, პოლიტიკურმა ოპონენტებმა საზოგადოებაში ისეთი განცდა გააჩინეს, თითქოს საკადრო გადაადგილება ჯოკია ბოდოკიას „კორუფციულ სქემასთან" იყო დაკავშირებული. სრული პასუხისმგებლობით შემიძლია ვთქვა, ბოდოკიასთან ამ ადამიანებს არანაირი კავშირი არ აქვთ, არც სამსახურებრივად და არც რაიმე გავლენა ჰქონდათ იმ საკითხთან მიმართებაში, რაზეც ჯოკია ბოდოკიაა დაკავებული.
მის საკითხს მე უფრო თაღლითობას დავარქმევდი, ვიდრე კორუფციას. მას თბილისის მერიასთან არსებულ საბჭოზე არანაირი გავლენა არ ჰქონდა, არც საკითხი იყო მერიაში შემოსული. შესაბამისად, მისი მხრიდან ფულის აღება დასახმარებლად, როცა დახმარება არ შეეძლო, ჩემი აზრით, თაღლითობაა და არა კორუფცია...
საკადრო გადაადგილებები დაკავშირებულია თბილისის მერიის ეფექტურობის გაზრდასთან. რაც შეეხება მარგიშვილს, ჯერ კიდევ ბოდოკიას დაკავებამდე ჰქონდა მას გადაწყვეტილება მიღებული, ამ თემაზე ვისაუბრეთ კიდეც. მას სურდა, თბილისში შეგვექმნა მეწარმეობის ხელშეწყობის ცენტრი და თვითონ ეხელმძღვანელა მისთვის... ამ საკადრო ცვლილებისთვის ვემზადებოდით. ამ გადაწყვეტილებას სამართალდამცავების მხრიდან ბოდოკიას დაკავება დროში დაემთხვა. ვინაიდან შესაბამისი ცვლილებები დაგეგმილი იყო, ის სისრულეში მოვიყვანეთ, დრო რომ არ დაგვეკარგა.
- თქვენ დარწმუნებით საუბრობთ იმიტომ, რომ იცნობთ გამოძიების დეტალებს და იცით, რომ ეს ლოკალური შემთხვევა იყო და არა კორუფციული გარიგება?
- ჩვენ გამოძიებას ვაწვდით ყველა მასალას და ყველა ინფორმაციას, რაც გამოძიებას დაეხმარება, საქმე ბოლომდე მიიყვანოს. თუმცა, ცალკეულ ნიუანსებზე, რა თვალსაზრისით და რა კუთხით მიდის ძიება, ეს ინფორმაცია არ გვაქვს და, ძიების ინტერესებიდან გამომდინარე, შეუძლებელიცაა, ჩვენ ეს ინფორმაცია გვქონდეს. მაგრამ დარწმუნებით ამას იმიტომ ვამბობ, რომ არც სამსახურებრივად ჰქონიათ ადამიანებს მასთან შეხება - არ იყო ის მათ დაქვემდებარებაში - და არც საბჭოსთან არანაირი შეხება არ ჰქონია...
- თქვენ აღნიშნეთ და დაგეთანხმებით, რომ პოლიტიკოსებმა ამ ორ პროცესში თანხვედრა კარგად გამოიყენეს. იყო საუბრები იმის შესახებ, რომ ბოდოკიამ თითქოს დაასახელა მერიის მაღალჩინოსნები... მამუკა არეშიძემ ისიც კი თქვა, თითქოს არსებობს ჩანაწერი, სადაც მარგიშვილსა და ბოდოკიას შორის ტენდერის თაობაზე გარიგებაზეა საუბარი...
- რა იციან გამოძიების დეტალები ან პოლიტიკოსებმა ან ექსპერტებმა, მათ შორის მამუკა არეშიძემ? ეს იქნებოდა კითხვა, რომელსაც ამ კითხვის საპასუხოდ შევაბრუნებდი. ეს იცის გამოძიებამ და დაველოდოთ... ის, რომ ამას ოსტატურად იყენებდნენ ოპონენტები, ფაქტია და ეს მათ სინდის-ნამუსზე იყოს. როცა არ აქვთ კონკრეტული ინფორმაციები, მტკიცებულებები და ადამიანს ჩირქს სცხებენ, ეს მათ სინდისსა და ადამიანობაზე იყოს. თუმცა, ჩვენი პოლიტიკური ოპონენტებისთვის ადამიანობა, ღირებულებები და მსგავსი ფასეულობები, პრაქტიკულად, არ არსებობს და ნულის ტოლია.
- ანუ დარწმუნებული ხართ...
- დარწმუნებული ვარ, რომ ბოდოკია ლოკალური შემთხვევა იყო, დარწმუნებული ვარ, რომ მას არ ჰქონდა ფართო მასშტაბები...
- საკადრო ცვლილებებზე რომ ვისაუბროთ... როდის დაინახეთ ასეთი ცვლილებების საჭიროება?
- მუდმივად მოვუწოდებდი და დღესაც მოვუწოდებ ჩვენი სისტემის თანამშრომლებს, უფრო სწრაფად მიიღონ გადაწყვეტილებები, უფრო გაბედულად იმოქმედონ - ყველა ის წვრილმანი საკითხი, რაც შეიძლება ქვედა დონეზე გადაწყდეს, ჩემამდე არ უნდა მოდიოდეს, ეს მენეჯმენტის ანბანია. ყველამ თავის დონეზე სწრაფად და ეფექტურად უნდა მიიღოს გადაწყვეტილებები. შეუძლებელია, ყველა გადაწყვეტილება ერთმა ადამიანმა მიიღოს. ხელმძღვანელმა უფრო საკვანძო და პოლიტიკური გადაწყვეტილებები უნდა მიიღოს, დანარჩენი ადგილზე უნდა იქნას მიღებული. ზოგიერთ შემთხვევაში ასეთ მიდგომებს ვერ ვხედავდი, ბევრი საკითხი მაინც ჩემამდე მოდიოდა.
- შეგიძლიათ, კონკრეტული მაგალითები მოიყვანოთ? რამ გამოიწვია თქვენი უკმაყოფილება, რა გადაწყვეტილება არ იყო მიღებული, რა დაზიანდა?
- დაზიანებით არაფერი დაზიანებულა. თუმცა, საზოგადოება ყოველთვის სწრაფად ითხოვს პრობლემების მოგვარებას, ყოველთვის სწრაფად ითხოვს პროგრესს. მეც ბუნებით ასეთი ვარ - მინდა ამ მოთხოვნებს რაც შეიძლება სწრაფად და ადეკვატურად ვუპასუხო, მინდა პროგრესი - უფრო სწრაფი და მმართველობა უფრო ეფექტური გვქონდეს...
- თქვენ აღნიშნეთ, რომ პრობლემები მენეჯმენტში იყო, ეს ის გუნდია, რომელიც თქვენ შეკარით, შეიძლება ითქვას, რომ ამ გუნდმა არ გაამართლა? ასეთ საკადრო გადაწყვეტილებაში საკუთარ სისუსტეს ხედავთ?
- გუნდი, რომლითაც ჩვენ მოვედით მერიაში, საკმაოდ ეფექტურად მუშაობდა, მაგრამ დაგვხვდა ძალიან ბევრი წინააღმდეგობა, ბევრი პრობლემა, რომლის დაძლევასაც საკმაოდ დიდი ენერგია მოვანდომეთ და საკმაოდ დიდი ნერვები დავახარჯეთ. დაგვხვდა ძალიან ბევრი მოუწესრიგებელი პროგრამა და პროექტი, უნებართვო მშენებლობები, ჩავარდნილი ტენდერები; დაგვხვდა ძალიან ბევრი საკადრო პრობლემა, „ნაციონალური მოძრაობის" სულისკვეთებით განმსჭვალული ადამიანები ყოველდღიურად საბოტაჟის რეჟიმში გვამუშავებდნენ. ამ პრობლემებს დაძლევა სჭირდებოდა. პირველი ექვსი თვის განმავლობაში ეს ამ გუნდთან ერთად დავძლიეთ. ახლა განვითარების დროა და განვითარების დროს გარკვეული გადაადგილებები საჭიროა, რადგანაც ახალი შემართებითა და შეცვლილი გუნდით მოხდეს უფრო სწრაფი პროგრესის მიღწევა.
- საკადრო დანიშვნების დროს რა კრიტერიუმებით ხელმძღვანელობთ? თქვენ ხომ მაღალი თანამდებობის პირებს ნიშნავთ, რომლებსაც განსაკუთრებული პასუხისმგებლობა აკისრიათ?
- პიროვნულად მხოლოდ სამსახურის ხელმძღვანელებს, მათ მოადგილეებსა და მსხვილი მუნიციპალური ორგანიზაციების ხელმძღვანელებს ვნიშნავ. სხვა საკადრო გადაწყვეტილებები ქვემოთ მიიღება კურატორი მოადგილეებისან სამსახურების ხელმძღვანელების მიერ. ვისზეც მე ვიღებ გადაწყვეტილებას, რამდენიმე მოთხოვნას ვუყენებ: სანდოობა, პროფესიონალიზმი, გუნდურობა, მართვის უნარი და გამოცდილება. ეს არის ოთხი მთავარი მოთხოვნა, რომელსაც ადამიანებს ვუყენებ შერჩევის დროს...
- უკვე თვეებია, ოპოზიცია თქვენს წინააღმდეგ კამპანიური ხასიათის დარტყმებს ახორციელებს... რატომ? ძალა იგრძნეს თქვენში? როგორ ფიქრობთ, როგორია თქვენ მიმართ ოპოზიციის დამოკიდებულება?
- ბოლო თვეების განმავლობაში თბილისის მერია მათი ერთ-ერთი სამიზნე გახდა. მიზეზის დადგენა დიდ სირთულეს არ წარმოადგენს... როგორც ჩანს, ეფექტური გუნდი, ძალიან ბევრი პროგრესი მათთვის მიუღებელია, ამიტომაც ცდილობენ, დარტყმები მოგვაყენონ და ამ გზით შეეცადონ, მერიის რეიტინგი შეამცირონ. ჩვენ რომ მართლა უსუსურები ვიყოთ, დარტყმის განხორციელება არ დასჭირდებოდათ. ძლიერ ძალას ხედავენ, ამიტომაც ცდილობენ, ათასგვარი მაქინაციით, ხშირ შემთხვევაში სიცრუითა და ამორალური ქცევებით, მოგვაყენონ დარტყმები. მათი მისვლა სხვადასხვა გამგეობებში, თბილისის მერიის წინ მუდმივი აქციები... ამ ადამიანების ამოცნობა მარტივია - ეს მათი აქტივისტები არიან, რომლებსაც ხან ვითომ გული წაუვათ, ხან კიდევ სხვა რამ შეემთხვევათ... ძალიან მარტივად იშიფრებიან. სახეზე ვცნობთ ამ ადამიანებს, პოლიტიკური ბრძოლა გვიწევდა წინასაარჩევნოდ და ბევრს იქიდან ვცნობთ. ვფიქრობ, დროთა განმავლობაში დაიღლებიან და მოსწყინდებათ, იმიტომ რომ ასეთი ქმედებებით შედეგს ვერ მიაღწევენ. ამიტომაც ჩემს თანამშრომლებს ხშირად მოვუწოდებ ხოლმე, საქმეს მიხედონ და ნაკლები ყურადღება მიაქციონ მათს ასეთ ქმედებებს. აქციის გამართვისა და აზრის გამოხატვის უფლება ნებისმიერ ადამიანს აქვს, გამოხატონ თავისი აზრი, მაგრამ ჩვენ ჩვენი ამოცანები გვაქვს ქალაქის განვითარებასთან დაკავშირებით და ამას ყოველდღიურ რეჟიმში ვასრულებთ.
- ამ კამპანიის კულმინაციად, თქვენი იმპიჩმენტის მოთხოვნა შეიძლება დავასახელოთ. ასეთი განცხადებები თითქოს საკრებულოშიც გაისმა. ფიქრობთ, რომ შესაძლოა, პროცესებმა ქუჩიდან საკრებულოში გადაინაცვლოს და რეალური პრობლემა დადგეს?
- სასაცილო და ღიმილისმომგვრელია ეს ყველაფერი... გადადგომისა თუ იმპიჩმენტის მოწოდება ისმის იმ ადამიანების მხრიდან, რომლებიც დამნაშავეთა რეჟიმს წარმოადგენდნენ და ამ რეჟიმის ცენტრში იდგნენ. გადაყენება უნდა მოითხოვონ იმ ადამიანის, ვინც კორუფციაშია, არაფერს აკეთებს... ჩვენ გუნდი ღიად და გამჭვირვალედ მუშაობს. ეს ბანალური ფრაზები, რასაც ისინი გაიძახიან, რა თქმა უნდა, არის აბსურდული. ასეთი აბსურდული ბრალდებით მაღალი ლეგიტიმაციით არჩეული მერის გადაყენება ან იმპიჩმენტი არ ხდება.
- გასაგებია, რომ ნაციონალების კამპანიაა თქვენს წინააღმდეგ, თუმცა აქვე მინდა გკითხოთ ბიძინა ივანიშვილის განცხადებებზეც. საკადრო გადაადგილებამდე რამდენმიე ხნით ადრე, მან მოგიწოდათ, გუნდისთვის გადაგეხედათ და მერია გააკრიტიკა... გქონდათ მასთან შეხვედრა? მისი კრიტიკა იყო თქვენთვის მოტივაცია, რომ უფრო სწრაფად მოგეხდინათ საკადრო ცვლილებები?
- ასეთი პათოსით გაკეთებულ განცხადებას ვერ ვიხსენებ. მისი განცხადების ძირითადი პათოსი თბილისის მერიის საქმიანობის ეფექტურობის გაზრდა იყო და გადაწყვეტილებების უფრო სწრაფად მიღება, რასაც მანამდეც ვამბობდი... ამაზე იყო საუბარი და, რა თქმა უნდა, აქ ჩვენი მოსაზრებები ერთმანეთთან თანხვედრაშია.
- „კრიზისის" ფონზე თქვენ თითქოს დუმილის უფლებას ინარჩუნებდით, საკრებულოში კი განმარტებების გაკეთებისკენ მოგიწოდებდნენ...
- ეს რას ნიშნავს? ვის მოწოდებებზე უნდა გავქცეულიყავი საკრებულოში, ნაციონალებისა და ერთი დამოუკიდებელი დეპუტატის დაძახებაზე? მე კანონმდებლობით დადგენილი წესით წარვდგები საკრებულოს წინაშე და წარვადგენ ანგარიშს... სხვათა შორის, ეს არ იქნება საკრებულოში ჩემი პირველი მისვლა, ბიუჯეტის დამტკიცების დროსაც ვიყავი, პერიოდულად უმრავლესობასთანაც მაქვს კონსულტაციები... ნაციონალების და ერთი დამოუკიდებელი დეპუტატის ყოველ დაძახებაზე იქ მისვლას არ ვაპირებ, მიუხედავად იმისა, რომ დასამალი არაფერი მაქვს და ყოველთვის შემიძლია, არგუმენტირებული პასუხი გავცე ყველას. შემიძლია ფაქტებით გავაკეთო იმის პრეზენტაცია, რა უბედურება დაგვხვდა ჩვენ აქ, რა გავაკეთეთ... ასე რომ, ყველაფერს თავისი დრო აქვს. თქვენი გაზეთის მეშვეობით მინდა ვკითხო მათ: გიგი უგულავა რამდენჯერ ახსოვთ თბილისის საკრებულოში ანგარიშით მისული? მით უფრო ოპოზიციის მიწვევით, მე რომ მიწვევენ ახლა?!
- ყველა მერს ჰქონდა ოპოზიციასთან ურთიერთობა და კონსულტაციები, თქვენ მათთან კომუნიკაცია გაქვთ?
- უგულავას ვისთან ჰქონდა ოპოზიციაში კომუნიკაცია?
- თუნდაც, ალასანიას პარტიის წევრებთან... ახლა სწორედ მისი პარტიის წევრებმა არ მოაწერეს ხელი, სხვათა შორის, თქვენს საკრებულოში „დაბარების" მოთხოვნას...
- დიდი მადლობა მინდა გადავუხადო იმ ოთხეულს, რომლებმაც მოთხოვნას ხელი არ მოაწერეს, ეს მათი მხრიდან დასაფასებელია, ისინი ნაციონალებისა და ერთი დამოუკიდებელი დეპუტატის ინიციატივას არ აჰყვნენ... რაც შეეხება ოპოზიციას, ზოგიერთ მათგანთან შეიძლება მქონდეს კომუნიკაცია, თუმცა, ეს არ ის ჩემი საკრებულოში მისვლის დროს და კანონიერების ფარგლებს არ სცდება, რომელიმე ოპოზიციურ ძალასთან გარიგებაში ნამდვილად არ ვიმყოფები და არც მაქვს სურვილი.
- თუმცა, ალასანიას პარტიაზე უკვე თქვეს, რომ თქვენთან გარიგებაში იმყოფებიან...
- რაზე უნდა გავრიგდეთ? არც გასაყოფი გვაქვს რამე და არც საერთო.
- როგორ ემზადებით ანგარიშისთვის საკრებულოში? განმარტებაში აღნიშნეთ, რომ აპირებთ, საკრებულოს მოუყვეთ, როგორი მძიმე მემკვიდრეობა დაგხვდათ მერიაში. რას გულისხმობთ? ნაციონალები აცხადებენ, რომ მათ ბიუჯეტიც სავსე დატოვეს, სისტემაც გამართული და კადრიც პროფესიონალი. ახლა კი იჭერენ კორუფციისთვის, ათავისუფლებენ მაღალჩინოსნებს, იწერენ მაღალ პრემიებს, ყიდულობენ ძვირადღირებულ მანქანებს, სკანდალურად ჩატარდა ატესტაციები... რა შეგიძლიათ ამას დაუპირისპიროთ?
- ციფრებით მივალ საკრებულოში...
- ციფრები ხალხს არ ესმის, მათ კონკრეტული საკითხები უფრო აინტერესებთ...
- რატომ აყენებთ ხალხს შეურაცხყოფას? ხალხს ძალიან კარგად ესმის ციფრები და შეუძლია შეადაროს, მაგალითად, რამდენი ადამიანი იყო დაჭერილი ნაციონალების მმართველობის დროს თბილისის მერიაში და რამდენი დააკავეს ჩვენი მმართველობის დროს. მეორე, რამდენი მანქანა იქნა შესყიდული მათი მმართველობის პერიოდში, გარკვეულ პერიოდში, და რამდენი შევისყიდეთ ჩვენ. არც ერთი მანქანა არ შეგვიძენია. მიუხედავადიმისა,რომ ძალიან კარგად იციან ამის შესახებ, თქვეს, თბილისის მერმა 100-ათასიანი მანქანა თბილისის ბიუჯეტიდან არა, მაგრამ დაცვის სამსახურიდან შეიძინაო. მაშინ, როცა ძალიან კარგად იციან, ეს მანქანა სწორედ მათი მმართველობის დროს არის შეძენილი. კერძოდ, 2011 წელს დაცვის სამსახურის მიერ და სანდრა რულოვსის მშობლები დადიოდნენ. ანუ თბილისის მერი დღეს სანდრა რულოვსის მშობლების გამონაცვალი მანქანით დადის. ასე რომ, მანქანა და მანქანები ნამდვილად არ შეგვიძენია. რაც შეეხება სავსე ბიუჯეტს, ინფრასტრუქტურულ პროექტებში ჩამორჩენა ჰქონდათ და შესაბამისად მართლაც იყო გაუხარჯავი ბიუჯეტი. მაგრამ ამხანაგობებისა დასოციალურ ნაწილში, საიდანაც მარტივად უნდოდათ, ხმები ეყიდათ, ბიუჯეტი პრაქტიკულად ცარიელი იყო. ამიტომაც მის შესავსებად ფულის სესხება მოგვიწია. რაც შეეხება კადრებს, ხაზს ვუსვამ, „ნაციონალური მოძრაობის" ძალიან ბევრი მაღალჩინოსნის ოჯახის წევრი დაგვხვდა მერიაში. ბევრმა თვითონ დაწერა განცხადება და წავიდა, სხვები ჩვენ გავათავისუფლეთ. შეუსაბამო იყო მათი კვალიფიკაცია, ქცევები და საქმიანობა დადგენილ მოთხოვნებთან... ჩავატარეთ ატესტაცია...
- უსამართლო ატესტაცია...
- არა, სამართლიანი. ვაპირებთ, რომ მომავალშიც გამოვაცხადოთ კონკურსი დარჩენილ ვაკანსიებზე... სხვათა შორის, მათი მმართველობის დროს, როცა იცოდნენ, რომ ახალი ხელისუფლება მოდიოდა, კონკურსი ჩაატარეს მხოლოდ გასაუბრების წესით, ყოველგვარი გამჭვირვალობისა და გარედან კომისიის წევრების მოწვევის გარეშე. გასაუბრებით ადამიანები უვადოდ დანიშნეს, რითაც დაარღვიეს კანონი. ახლა ჩვენ მოგვიწოდებენ, რომ ვიყოთ ღია და გამჭვირვალე. და ეს მაშინ, როცა ჩვენ ამ პროცესში საზოგადოებრივი ორგანიზაციებიც ჩავრთეთ.
- ადამიანური თვალსაზრისით თქვენში რა ბრალდებები იწვევს ყველაზე მეტად გაღიზიანებას?
- ყველაზე მეტად მაინც დაუნახაობა მოქმედებს ჩემზეც და ჩემს გუნდზეც... როცა გუნდთან ერთად დღე და ღამე ვმუშაობთ, ოპონენტები კი ცდილობენ, ათასგვარი მეთოდებით ამის დისკრედიტაცია მოახდინონ... მაგრამ ჩვენ ჩვენი ამოცანა გვაქვს და ნაკლებად გვაინტერესებს მათი პათოსი... საზოგადოებას მოვუწოდებთ, ყური არ უგდონ მათ გამონათქვამებსა და შეფასებებს... თუმცა, ეს საზოგადოებამ ისედაც კარგად იცის...
- მაშინ ერთი პრობლემა... თბილისის ქუჩებში რამდენიმე დღეა, ამოღებულია ასფალტი და ახალს არ აგებენ, მაგალითად, სანაპიროზე...
- დღეს დაიგო... ოთხი დღე იყო, არა, სამი დღე და მეოთხე დღეს დააგეს... არის ასეთი ცალკეული შემთხვევები, როცა კონტრაქტორი ორგანიზაციები მოჭრიან გზას და დადგენილი წესის შესაბამისად - მათ 24 საათის განმავლობაში უნდა შეავსონ ორმო ახალი ასფალტით - ვერ აგებენ სხვადასხვა მიზეზით: ვერ იღებენ ასფალტს ქარხნიდან ან ტექნიკა უფუჭდებათ, ჩვენ მათ ვაჯარიმებთ... გვაქვს რამდენიმე შემთხვევა, როცა კომპანიას კონტრაქტი გავუწყვიტეთ და შევიყვანეთ სხვა. ცალკეული შემთხვევები არის, მასიური - არა...
- რაც შეეხება სავალუტო კრიზისს, როგორ იმოქმედებს ეს დედაქალაქის ბიუჯეტზე?.. აპირებთ ცალკეული პროექტების შემცირებას?..
- დოლარის მიმართ ლარის კურსის სწრაფი მერყეობა მოქმედებს სატენდერო ფასებზე, მაგრამ არ შეიძლება ამას სავალუტო კრიზისი ვუწოდოთ, ეს გადაჭარბებული შეფასებაა. რამდენიმე შემთხვევაში მოგვიწია ტენდერის ხელახლა გამოცხადება და ფასების გაზრდა. მოგეხსენებათ, სამშენებლო მასალებზე ფასები გაიზარდა და კონტრაქტორებისთვის ძველი ფასები წამგებიანი იყო. ამ მიმართულებით გეგმები გადავალაგეთ. თუმცა, ზაფხულიდან აქტივობა მოიმატებს და კურსი დასტაბილურდება.
- რაც შეეხება ფასების ზრდას პროდუქტებზე, მერიაც ჩაერთვება ამ პროცესში თუ ეს მხოლოდ ხელისუფლების ფუნქციაა? ვგულისმხობ ისეთი ზომების მიღებას, რომელიც პროდუქტებზე ფასებს მნიშვნელოვნად არ გაზრდის...
- რა თქმა უნდა, ეს არის ცენტრალური ხელისუფლების უფლებამოსილება. როგორც ფისკალურ, ისე მონეტარულ პოლიტიკას შესაბამისი უწყებები ხელმძღვანელობენ. თბილისის მერიის ფუნქცია და როლი აქ არის ის, რომ ხელი შეუწყოს საინვესტიციო პროექტებს, ხელი შეუწყოს კაპიტალური პროექტების სწრაფ განხორციელებას, რაც ბიუჯეტიდან ფინანსდება, რათა შეამსუბუქოს ეკონომიკაში არსებული ტვირთი...
- საკადრო ცვლილებების შემდეგ, შეგვიძლია ვთქვათ, რომ „კრიზისი" დაძლეულია? რას ელოდებით ახალი გუნდისგან?
- ახალი გუნდისგან მეტ აქტივობასა და საქმიანობის ეფექტურობის გაზრდას ველოდები, „კრიზისი" არ არსებობდა, სტაბილურად ვვითარდებოდით, მაგრამ ახლა უკვე სწრაფი და მდგრადი განვითარების დროა.
ქეთი ხატიაშვილი
გაზეთი „პრაიმ ტაიმი"
