დღეიდან თბილისის საქალაქო სასამართლო ბუტა რობაქიძის მკვლელობის საქმის არსებით განხილვა იწყება. პროცესი 12.00 საათზეა ჩანიშნული. საქალაქო სასამართლომ ბრალდებისა და დაცვის მხარის მტკიცებულებები წინა პროცესზე დასაშვებად ცნო, მათ შორის ერთ-ერთი ბრალდებულის, ირაკლი ფირცხალავას მიერ მოპოვებული მკვლელობის ადგილზე გადაღებული ვიდეოფირი, რომლის აცილებასაც ბრალდების მხარე მოითხოვდა.
ყველა ბრალდებულმა ერთხმად უარი თქვა საქმის ნაფიცი მსაჯულების პირობებში განხილვაზე. ერთ-ერთი ბრალდებულის გურამ დონაძის განაცხადებით, მან ნაფიცი მსაჯულების მიერ საქმის განხილვაზე უარი ერთადერთი მოტივით თქვა, რადგან წლების განმავლობაში ბუტა რობაქიძის საქმის ირგვლივ საზოგადოება ცრუ ბრალდებებით „იწამლებოდა".
„ნაფიც მსაჯულებში საქმის განხილვას არ დავეთანხმე იმიტომ, რომ დღევანდელი ხელისუფლება არაერთაზროვნად უყურებს ნაფიც მსაჯულებს. რომელ ნაფიც მსაჯულებს უნდა ენდოს საქმე, როცა წლების განმავლობაში ხდებოდა ადამიანების მოწამვლა", - განაცხადა გურამ დონაძემ.
