უკვე 2 წელზე მეტია, საქართველოს პარლამენტის ეროვნული ბიბლიოთეკის ეგიდით, მსოფლიოს სხვადასხვა ქალაქების უნივერსიტეტებში ქართული ბიბლიოთეკის კუთხე იხსნება. ამჯერად ქართული და საქართველოს შესახებ უცხოენოვანი წიგნები პრაღაში, მსოფლიოს ერთ-ერთ უძველეს - კარლოსის უნივერსიტეტში გაიგზავნა.
ეროვნული ბიბლიოთეკის გენერალური დირექტორის ცნობით, ეს მსოფლიოს მეცამეტე ქალაქია, სადაც ქართული ბიბლიოთეკა შეიქმნა. ქართული წიგნების კუთხე უკვე არსებობს შემდეგ ქალაქებში: კიევი, პრატო, ბარი, პრეტორია, ვენა, სტამბოლი, მიუნხენი, რეჯე დე კალაბირია, ბაქო. ბიბლიოთეკის რესურსი კი ძირითადად კერძო შემოწირულობებით კომპლექტდება. ამჯერად პრაღაში 50 წიგნი იქნა გაგზავნილი და აქედან უმრავლესობა თანამედროვე ქართველ ავტორებს ეკუთვნით. ასევე უკვე გროვდება წიგნები საქართველოს შესახებ, რომელიც ქართულ კუთხეს დაემატება.
მალე ასეთივე კუთხეები გაიხსნება ბარსელონაში, ჯაკარტასა და ნიუ-იორკში. წიგნის კუთხეები მხოლოდ ქართულენოვან წიგნებს არ გულისხმობს - იქ იქნება უცხოენოვანი ლიტერატურა საქართველოს შესახებ და თარგმანები.
ეროვნული ბიბლიოთეკის გენერალური დირექტორი და ამ პროექტის იდეის ავტორი გიორგი კეკელიძე კარლოსის უნივერსიტეტში საჯარო ლექციის წასაკითხადაა მიწვეული.
ქართული წიგნის კუთხე პრაღაში მაისის შუა რიცხვებში გაიხსნება.
(მოამზადა ნათია ცუხიშვილმა)
