„ქართულ მედიას უყურადღებოდ დარჩა საკითხი, რომელმაც, შესაძლოა, უახლოეს მომავალში დიდი გავლენა მოახდინოს საქართველოზე",- ამის შესახებ პოლიტოლოგმა რამაზ საყვარელიძემ „რეპორტიორის" პრესკლუბში განაცხადა.
მისი განმარტებით, საქართველოს საგარეო ურთიერთობებში მნიშვნელოვანი მოვლენები ხდება. პოლიტოლოგის თქმით, უკრაინაში განვითარებულმა მოვლენებმა ქართველებს დაანახვა, რომ უსაფრთხოების მხრივ მხოლოდ დასავლეთზე დამოკიდებული ვერ იქნება.
„უკრაინის მოვლენებმა დაგვანახვა, რომ დასავლეთი ყოვლისშემძლე არ არის, ის ბევრს აკეთებს, მაგრამ არის ზღვარი, რომლის იქით დასავლეთს უჭირს ნაბიჯების გადადგმა. ჩვენ და ყველა ქვეყანამ, რომელიც მხოლოდ დასავლეთზეა დამოკიდებული უსაფრთხოების თვალსაზრისით, სხვა გზები უნდა ვეძებოთ.
დასავლეთს ახლა უჭირს იმ ტიპის რუსეთთან ურთიერთობა, რომელიც ჩამოყალიბდა. საქართველომ რამე უნდა მოიფიქროს და მგონი, ალტერნატიული ვარიანტები ჩნდება. კეთდება ახალი სატრანსპორტო მაგისტრალი, უნიკალური თავისი სიდიდით და სიმძლავრით - პეკინიდან ევროპამდე და ეს ხაზი საქართველოზე გადის. თუ ჩინეთისთვის აბრეშუმის გზის ხაზი მნიშვნელოვანია, მაშინ საქართველოს უსაფრთხოებაზე უკვე აღმოსავლეთიდან ჩინეთი იზრუნებს",- აღნიშნა საყვარელიძემ.
