„ხმა აიმაღლე მუსიკისთვის" - ამ სლოგანით აღინიშნება წელს 26 აპრილს ინტელექტუალური საკუთრების მსოფლიო დღე. საქართველოს ინტელექტუალური საკუთრების ეროვნული ცენტრი - „საქპატენტი" ინტელექტუალური საკუთრების მსოფლიო დღის წლევანდელ თემასთან დაკავშირებით აგრძელებს კამპანიას, რომლის მიზანია საზოგადოების ცნობიერების ამაღლება და ბრძოლა მეკობრეობისა და საავტორო უფლებების დარღვევების წინააღმდეგ.
კამპანიის ფარგლებში ინტელექტუალური საკუთრების ეროვნულმა ცენტრმა „საქპატენტმა" საავტორო უფლებების დაცვის თემაზე მუსიკოსებთან სამუშაო შეხვედრა გამართა. ვორქშოფი ინტელექტუალური საკუთრების სასწავლო ცენტრში გაიმართა.
„საქპატენტის" თავმჯდომარე ნიკოლოზ გოგილიძემ მუსიკოსებთან ერთად განიხილა თემები „როგორ დავიცვათ საავტორო უფლებები" და „საავტორო უფლებების დარღვევა და ზიანის ანაზღაურება". მუსიკოსების წინაშე ასევე მოხსენებით წარსდგა საავტორო უფლებების ასოციაციის თავმჯდომარე გიგა კობალაძე თემით „როგორ ვმართოთ საავტორო უფლებები".
შეხვედრის ბოლოს „საქპატენტის" თავმჯდომარემ მუსიკოსების კითხვებს უპასუხა და პრაქტიკული რჩევები მისცა მათ საავტორო უფლებების დაცვის თემაზე.
