"არა სოჭის ოლიმპიადას! არა ოკუპაციას!" - საქართველოს 20 ქალაქში საპროტესტო აქციები გაიმართა. თელავის ცენტრში სხვადასხვა უნივერსიტეტის სტუდენტები შეიკრიბნენ და სიმბოლურად მავთულხლართიც გააბეს. აქციის მონაწილეები მოქალაქეებს აქტიურობისკენ მოუწოდებენ და ქართველების ოლიმპიადაში მონაწილეობის საწინააღმდეგოდ პეტიციაზე ხელის მოწერას სთხოვენ. ამ დროისთვის სტუდენტებმა უკვე 25 ათასი ხელმოწერა შეაგროვეს.
„ჩვენ ვაპროტესტებთ სოჭის ოლიმპიადას ანუ ეს არის რუსეთის პროექტი. იმ პერიოდში როდესაც მიმდინარეობს ქვეყნის ოკუპაცია არ უნდა წავიდეს ეს ქვეყანა ოლიმპიადაზე." - ამბობს აქციის ერთ-ერთი მონაწილე, ალექსანდრე ჭარბაძე.
აქცია ასევე გაიმართა ზუგდიდშიც. ქალაქის ცენტრში საზოგადოების წარმომადგენლები და არასამთავრობო ორგანიზაციები გამოვიდნენ. მათი მოთხოვნაა, ქვეყანამ სოჭის ოლიმპიადაში მონაწილეობის საკითხს გადახედოს.
