სასჯელაღსრულების N8 დაწესებულებაში, უსაფრთხოების სამსახურმა ნარკოტიკული საშუალების შეტანის მცდელობა აღკვეთა. ინფორმაციას სასჯელაღსრულებისა და პრობაციის სამინისტრო ავრცელებს.

სამინისტროს ინფორმაციით, დაკავებულია მოქალაქე შ.ტ. რომელიც ამანათის საშუალებით მამასთან, მსჯავრდებულ კ.ტ.-სთან  ე.წ. მარიხუანას შეგზავნას ცდილობდა. აღნიშნული ნარკოტიკული საშუალება ამანათში ჩადებული ჯინსის ჯიბის სარჩულში იყო ჩაკერებული. პირი, რომელთანაც აღნიშნული ამანათი შეჰქონდათ, სასჯელს სწორედ ნარკოტიკული დანაშაულისთვის იხდის.

„2013 წლის 18 ოქტომბერს, სასჯელაღსრულების N17 დაწესებულებაში ციხის გარე პერიმეტრიდან მობილური ტელეფონების გადაგდების მცდელობა აღიკვეთა. დაწესებულების გუშაგებმა და უსაფრთხოების სამსახურმა  დააფიქსირეს პირი, რომელმაც სიმბარათებიანი ორი მობილური ტელეფონის ციხის ტერიტორიაზე გადაგდება მოახერხა. შემთხვევა ადგილზევე აღიკვეთა და ეჭვმიტანილი პირი მ.მ. ამ დროისთვის დაკავებულია.  აღსანიშნავია, რომ დაკავებული პირი წარსულში იგივე დაწესებულებაში იხდიდა სასჯელს და ის მიმდინარე წლის 22 იანვარს გათავისუფლდა", - აღნიშნულია სასჯელაღსრულების სამინისტროს განცხადებაში.

უწყების ინფორმაციით, სასჯელაღსრულების N15 დაწესებულებაში კიდევ ერთი დანაშაულებრივი ფაქტი გამოვლინდა. 4 მსჯავრდებული მსჯავრდებულ გ.ღ-სთვის 15 000 ლარის გამოძალვას ცდილობდა. აღნიშნული ფაქტის სასჯელაღსრულების დაწესებულების ადმინისტრაციისთვის შეტყობისთანავე, ფაქტის გამოძიება დაიწყო. ამ დროისათვის ყველა ეჭვმიტანილი პირი დანარჩენი მსჯავრდებულებისგან იზოლირებულია და მათზე განსაკუთრებული კონტროლი ხორციელდება.

სასჯელაღსრულების, პრობაციისა და იურიდიული დახმარების საკითხთა სამინისტრო ყველა მსჯავრდებულს  და მათი ოჯახის წევრებს მოუწოდებს, ნებისმიერი მსგავსი ინციდენტის შესახებ საქმის კურსში ჩააყენონ სასჯელაღსრულების დეპარტამენტი. უწყვეტ რეჟიმში მუშაობს ცხელი ხაზი 2 25 70 47.  შეტყობინების შემთხვევაში კონფიდენციალურობა გარანტირებულია. ყველა მსგავს ფაქტზე მოხდება უმკაცრესი რეაგირება და ციხის ადმინისტრაცია კრიმინალური, კორუფციული სქემის ამოქმედების ყველა მცდელობას აღკვეთს.