ჟურნალისტი ირაკლი კორძაია საქართველოში დაბრუნდა. როგორც კორძაიამ გადაცემაში „რეაქცია" განაცხადა, მას რიგაშიც და ბერლინშიც ერთ-ერთი მაღალჩინოსანი, სანდო პიროვნება დაუკავშირდა და უსაფრთხოების გარანტიები მისცა.
კორძაია ბიზნესმენ ბესიკ ხარძიანის მკვლელობის საქმის გამოძიების შესახებ აღნიშნავს, რომ პროკურატურა სრულ გულგრილობას ამჟღავნებს.
„რიგაშიც და ბერლინშიც დამიკავშირდა პირი, რომელმაც უსაფრთხოების გარანტიები მომცა და გადავწყვიტე საქართველოში დაბრუნება. თუმცა იქ ყოფნისას უკვე მყარად მქონდა გადაწყვეტილი დარჩენა.
ბოლო ორი-სამი თვის განმავლობაში ვაკვირდებოდი იმ მოვლენებს, რომელიც ბესიკ ხარძიანის მკვლელობასთან დაკავშირებით ვითარდებოდა. ეს იყო აბსოლუტური უმოქმედობა პროკურატურის მხრიდან. უკვე სამ თვეზე მეტია გასული ბესოს მკვლელობიდან და ეს საქმე იმდენად მიჩუმათებულია, თითქოს არაფერი მომხდარა. არაფერს ვამბობ იური ვაზაგაშვილის მკვლელობაზე.
თუ დაიწყება სამართლებრივი მსვლელობა ჩემი განცხადებების საფუძველზე, ეს იქნება ძალიან კარგი. ამის იმედი ჯერ-ჯერობით მაქვს, თუ არა და საქართველოს დატოვება გვიანი არასდროს არის. მაგრამ ადამიანს ამის სურვილი არ უნდა ჰქონდეს, რომ დატოვოს საკუთარი ქვეყანა რამდენად რთული სიტუაციაც არ უნდა იყოს."- განაცხადა ირაკლი კორძაიამ.
