ჟურნალისტი ვახო სანაია მისი ძმის, გიორგი სანაიას მკვლელობის შესახებ საუბრობს და აცხადებს, რომ მისი ძმის მკვლელობის გამოძიება მთლიანად გაყალბებულია.
ამის შესახებ ვახო სანაიამ გადაცემაში „იმედის კვირა" განაცხადა.
გიორგი სანაიას მკვლელობის გამომძიებელი, სერგო ძაგნიძე 4 ივნისს სამხედრო პოლიციის დეპარტამენტის უფროსად დაინიშნა. ვახო სანაიას განცხადებით, ძაგნიძე მკვლელობის საქმეს გახსნილად აცხადებს და სხვადასხვა მედია საშუალებებში აღნიშნავს, რომ გამოძიება პროფესიონალურად წარიმართა.
„გიორგი სანაიას საქმე არის თავიდან ბოლომდე გაყალბებული. მე არ ვამბობ, რაღაც ეპიზოდებს, ეს არის თავიდან ბოლომდე გაყალბებული საქმე და ადამიანი, რომელიც მონაწილეობდა ამ ყველაფერში, დღეს არის სამხედრო პოლიციის დეპარტამენტის უფროსი.
ამ ადამიანმა რამდენიმე თვის წინ მისცა ინტერვიუ პრესას, სადაც რაიმე გულისტკივილს კი არ გამოხატავს ამ სამქესთან დაკავშირებით, პირიქით, ის ამბობოს, რომ საქმე ისე გამოიძია, რომ ეს მსოფლიოს მასშტაბით კრიმინალისიტიკის სახელმძღვანელოებშია შესატანი.
ამ საქმის გასახსნელად მხოლოდ სამართლებრივი გზით ვიბრძოლებ. მინდა ვთქვა, რომ მოხდა ძალიან ცუდი რაღაც ამ წლების განმავლობაში. პირველივე დღიდან ვამბობთ, რომ ეს არის პოლიტიკური მკვლელობა. შევარდნაძის პერიოდში ამ საქმის გახსნა წარმოუდგენელი იყო. ამ მხრივ არც მომდევნო წლებში გაკეთებულა რამე."- განაცხადა ვახო სანაიამ.
