"რუსთავი 2"-სა და "იმედის" ტელეკომპანიებში განმარტავენ , რომ ეგზითპოლის შედეგები საარჩევნო უბნების დახურვისთანავე გახდება ცნობილი. 
"იმედის" დაკვეთით  ეგზიტპოლს ACT ჯგუფი ჩაატარებს. ტელეკომპანიის ინფორმაციით, კვლევითი ორგანიზაცია, რომელიც საკონსულტაციო საქმიანობასაც აწარმოებს, 2002 წელს დაარსდა და დღემდე 1000-ზე მეტი პროექტი განახორციელა. 
ACT ჯგუფი პროექტებს პოსტსაბჭოთა სივრცის თითქმის ყველა ქვეყანაში ახორციელებდა და რამდენიმე ბიზნესასოციაციის წევრიაცაა.
ACT ჯგუფი საქართველოს მასშტაბით 120 უბანზე 18 ათასამდე პირის გამოკითხვას გეგმავს, ცდომილება კი 2-დან 4%-მდე იქნება. "რუსთავი 2"-ის დაკვეთით ეგზიტპოლს კი გერმანული კომპანია GFK ჩაატარებს. ტელეკომპანიის ინფორმაციით, კომპანია საზოგადოებრივი აზრის კვლევის ერთ-ერთი ლიდერია და მაღალი ხარისხის კვლევების გამო არაერთი ჯილდო აქვს მიღებული. "რუსთავი 2"-ის ცნობით, GFK-მ ეგზიტპოლები 2010 წლის ადგილობრივ და 2012 წლის საპარლამენტო არჩევნებზეც ჩაატარა. 
კომპანია საქართველოს მასშტაბით 100 საარჩევნო უბანზე 7 ათასამდე ამომრჩეველს შემთხვევითი შერჩევის პრინციპით გამოკითხავს.