2014 წლის თებერვალში, რუსეთის ქალაქ კურსკის ოლქის სოფელ კარპუნევკაში, სამშენებლო სამუშაოების დროს მიმდინარე გათხრებისას ახალგაზრდა მამაკაცის ნეშტი აღმოაჩინეს, რომელსაც თან საბუთები ჰქონდა.

როგორ გაირკვა, გარდაცვლილი ჩოხატაურის მუნიციპალიტეტის სოფელ გუთურის მკვიდრი გაიოზ ილარიონის ძე კობიძეა, რომელიც 19 წლის იყო, როცა სამამულო ომში წავიდა და 1943 წლის შემდეგ მის შესახებ არავითარი ცნობა არ მოსულა.

გაიოზი უგზო-უკვლოდ დაკარგულად ითვლებოდა.

საბუთებთან ერთად ნაპოვნია დედის მიერ გამოგზავნილი წერილი, რომელიც გარდაცვლილს გულის ჯიბეში ჰქონდა.

როგორც სოფელ გუთურის რწმუნებული გიორგი პაიჭაძე აცხადებს, კურსკიდან საქართველოს ომის, შრომისა და სამხედრო ძალების ვეტერანთა კავშირის თავმჯდომარეს რეზო ნაცარიშვილს დაუკავშირდნენ:

„ბატონო რეზო გაემგზავრა რუსეთში, ჩავიდა კარპუნევკაში, სადაც გაიოზის ნეშტი ადგილობრივ ეკლესიაში იყო დასვენებული. მოაგვარა ყველა დეტალი და კვირას, ჩვენი სოფლის მკვიდრის ნეშტს თბილისში ჩამოასვენებენ", - განაცხადა პაიჭაძემ.

მისივე ინფორმაციით, ჩამოსვენების ხარჯები რუსეთის ფედერაციამ გაიღო.

დიდ სამამულო ომში დაღუპულ თანამემამულეს, გაიოზ კობიძეს გუთურის სასაფლაოზე ორშაბათს, ძმის გვერდით პატივით დაკრძალავენ. ცერემონიალს სტუმრები რუსეთიდან და თბილისიდანაც დაესწრებიან.

ომში დაღუპულ თანამებრძოლს პატივს ვეტერანებიც მიაგებენ.

წყარო:   gurianews.ge