დღეს დაახლოებით 15 საათსა და 10 წუთზე „მაესტროს" ჟურნალისტის, ია თინიკაშვილის ჩართვისას პირდაპირ ეთერში ინციდენტი მოხდა. თინიკაშვილი შიდა ქართლში არჩევნების მიმდინარეობაზე საუბრობდა, ის ცხინვალის რეგიონის სოფელ ხურვალეთში ე.წ. საზღვარზე გავლებული მავთულხლართებთან იმყოფებოდა, როცა ოსური სანომრე ნიშნის მქონე ავტომანქანა მიუახლოვდა.
მანქანაში მსხდომმა სამმა პირმა „მაესტროს" ჟურნალისტსა და ოპერატორს სიტყვიერი შეურაცხყოფა მიაყენა. როგორც "მაესტროს" კორესპონდენტმა პირდაპირ ეთერში განაცხადა, მას ერთ-ერთი პირი „ცეცხლის გახსნითაც დაემუქრა", თუ ოპერატორი მათი მიმართულებით მიატრიალებდა კამერას. გადამღებ ჯგუფს მავთულხლართებს მიღმა მცხოვრები დავით ვანიშვილის მეუღლე გამოესარჩლა, თუმცა მანქანაში მყოფმა პირებმა სიტყვიერი შეურაცხყოფა მასაც მიაყენეს.
ინციდენტიდან ერთ საათში ტელეკომპანიამ გაავრცელა ინციდენტის ამსახველი კადრები, მათ შორის ის მასალაც, რაც მანამდე პირდაპირ ეთერში არ მოხვდა.
ფაქტის შესახებ ინფორმირებულია შინაგან საქმეთა სამინისტრო. სამინისტროს პრეს-სამსახურის ხელმძღვანელის, ნინო გიორგობიანის თქმით, ინციდენტთან დაკავშირებით ეცნობა ევროკავშირის სადამკვირვებლო მისიას და ამოქმედდა ცხელი ხაზი.
