ქალაქ ბათუმის მერია გარემოვაჭრეების უსახური ჯიხურების ქალაქის ცენტრში ჩადგმასთან დაკავშირებით განმარტებებს აკეთებს. როგორც ბათუმის მერიის ადმინისტრაციული ზედამხედველობის განყოფილების უფროსმა თენგიზ მესხიძემ განაცხადა, 21 ჯიხური გარემოვაჭრეებთან შეთანხმების საფუძველზე გადაიტანეს "ჭაჭის თაუერის" მიმდებარედ. მისი თქმით, გარემოვაჭრეებმა ჯიხურები თავიანთი ძალებით, თვითნებურად დაამზადეს და სხვადასხვა ადგილზე განათავსეს.
„გოგებაშვილის ქუჩაზე ჯიხურები განთავსებული იყო თავიდანვე უნებართვოდ. ბათუმის მერიის მიერ გამოყოფილ ადგილზე მოხდა ამ ჯიხურების გადატანა გარემოვაჭრეებთან შეთანხმების საფუძველზე. ისინი არ წავიდნენ წინააღმდეგნი გადატანის გამო, რადგან ეს ადგილი 200 მეტრითაა დაშორებული იმ ტერიტორიასთან, სადაც ადრე ვაჭრობდნენ. გოგებაშვილის ქუჩაზე ტროტუარზე განლაგებული ჯიხურები იყო მიუღებელი, რადგან იყო უსახური და ასევე დამსვენებლებს გადაადგილებაში უშლიდა ხელს. გარემოვაჭრეები აპროტესტებენ მხოლოდ იმას, რომ ერთად რომ ვიქნებით, ყველანი ვერ ვივაჭრებთო. ვფიქრობ, ერთად რომ იქნებიან, კონკურენციაც იქნება და მეტი ვაჭრობაც. სტუდენტებთან დასრულდა მოლაპარაკება და მერიის საღებავებით შეიღებება ეს ჯიხურები. მომდევნო წელს კი ჩანაცვლდება ახალი ჰოლანდიური ტიპის ჯიხურებით ბათუმის იერსახესთან შესაბამისობაში", - განაცხადა თენგიზ მესხიძემ.
