2 ივლისს სენაკში რევაზ ლაღიძის პრიზისა და ოქროს მედლის მფლობელ საქართველოს სახალხო ანსამბლს, კონკურსებისა და ფესტივალების მრავალგზის ლაურეატ „კოლხურ ტრიოს" ვარსკვლავი გაუხსნეს.
„კოლხური ტრიო" 40 წელია გამორჩეული შემოქმედებითი ბიოგრაფიის მქონე კოლხური სიმღერების უბადლოდ შემსრულებელია.
1975 წლიდან დონარა მიმინოშვილის, დარეჯან ფაჩულიას და ბელა ქამადაძის შემადგენლობით „კოლხური ტრიოს" გამოჩენამ უმალვე მიიპყრო ფართო საზოგადოების ყურადღება. მრავალი უნიკალური სიმღერის წარმოჩენით და შექმნით მათ გაამდიდრეს და განუმეორებელი ხიბლი შესძინეს ქართული ხალხური სიმღერის საგანძურს. დონარა მიმინოშვილის გარდაცვალების შემდეგ ანსამბლში მისი ქალიშვილი - ეკა კოღუა აგრძელებს მოღვაწეობას. სწორედ ამ შემადგენლობით წარდგა აკაკი ხორავას სახელობის სენაკის სახელმწიფო დრამატულ თეატრში „კოლხური ტრიო" საიუბილეო საღამოზე.
ღონისძიებას ესწრებოდა სენაკის მუნიციპალიტეტის გამგებელი გოჩა დგებუაძე, რომელმაც სენაკის საპატიო მოქალაქის წოდება მიანიჭა და სიგელები გადასცა მომღერლებს. ანსამბლს წარმატებები უსურვა საქართველოს პარლამენტის წევრმა, სენაკის მაჟორიტარმა დეპუტატმა გურამ მისაბიშვილმა. მუნიციპალიტეტის საკრებულოს თავმჯდომარის სახელით მომღერლებს მიესალმა საკრებულოს თავმჯდომარის თანაშემწე ირინე დგებუაძე.
საღამოს დასასრულს, დრამატული თეატრის წინ ფოიერვერკების ფონზე საზეიმოდ გაიხსნა „კოლხური ტრიოს" ვარსკვლავი.
