მოძრაობა „ეროვნულები" განცხადებას ავრცელებს:

„1992 წლის 6 ივლისს უდიდესი ტრაგედია დატრიალდა სამეგრელოში, კერძოდ წალენჯიხაში, როდესაც შევარდნაძის რეჟიმის მიერ შეიარაღებული შეტაკება მოხდა „მხედრიონის" კრიმინალური  ბანდებსა  და ადგილობრივ მოსახლეობას შორის, რის გამოც დაიღუპნენ უდანაშაულო, მშვიდობიანი  ადამიანები, ზვიად გამსახურდიას კანონიერი ხელისუფლების მებრძოლები. შევარდნაძის ხუნტის მიერ ფაქტიურად მთლიანი რაიონის დარბევა მოჰყვა, გადამწვარი საცხოვრებელი სახლები, დახვრეტილი მშვიდობიანი ადამიანები, დარბეული წალენჯიხის ტაძარი..." - ნათქვამია განცხადებაში.

2015 წლის 6 ივლისს მოძრაობა „ეროვნულების" მიერ ჩატარდა ამ დღისადმი მიძღვნილი აქცია. საქართველოს სხვადასხვა კუთხიდან ჩასულმა ეროვნული მოძრაობის წარმომადგენლებმა პატივი მიაგეს დაცემულ მამულიშვილებს მემორიალთან, რომელიც წალენჯიხის ცენტრში დაიდგა. რაიონის კულტურის სახლში მოძრაობა „ეროვნულებმა" დაღუპულ გმირთა ოჯახის წევრებს გადასცეს სპეციალური სიგელები და ორდენები. სიტყვით გამოვიდნენ სახელმწიფო მინისტრის მოადგილე სანდრო ბრეგაძე, მოძრაობა „ეროვნულების" თავმჯდომარე კახა მიგინეიშვილი, მოძრაობა „ხსოვნის" ხელმძღვანელი მადონა მაქაცარია,  ეროვნული მოძრაობის ადგილობრივი წარმომადგენლები.