"საქართველოს ახალგაზრდა იურისტთა ასოციაციის" გორის ოფისში საპრეზიდენტო არჩევნებისთვის წინასაარჩევნო კამპანიის მონიტორინგის განხორციელების საკითხზე იმსჯელეს. შეხვედრას მუნიციპალიტეტის წარმომადგენლებიც ესწრებოდნენ. „საიას" რეგიონალური ხელმძღვანელის, ქეთი ბებიაშვილის განცხადებით, წინასაარჩევნო პერიოდში მისი ორგანიზაცია განსაკუთრებულ ყურადღებას პოლიტიკური პარტიების მიერ ადმინისტრაციული რესურსის შესაძლო გამოყენების ფაქტებს და მათზე სამართლებრივ რეაგირებას დაუთმობს. გორში წინასაარჩევნო კამპანიის მიმდინარეობას ორგანიზაცია „სამართლიანი არჩევნებიც" დააკვირდება.
გორის გამგებლის მოადგილის, ნინო წეწვაძის განცხადებით, ადმინისტრაციული რესურსის გამოყენების ფაქტები ამ ეტაპზე არ დაფიქსირებულა. „საიას" რეგიონალური ხელმძღვანელი კი იმედს გამოთქვამს, რომ წინასაარჩევნოდ ადმინისტრაციული რესურსის გამოყენება და პოლიტიკური ნიშნით დევნა არ იქნება.
